Аввал хабар қилинганидек, Ўзбекистон ҳукумати делегацияси Беларус Республикаси Несвиж шаҳрида бўлиб турибди.
Бугун, 4 июнь куни Евроосиё Иқтисодий Иттифоқи Ҳукумат раҳбарлари Кенгашининг навбатдаги мажлиси бўлиб ўтди.
Унда Арманистон Республикаси Бош вазири ўринбосари М.Григорян, Беларусь Республикаси Бош вазири Р.Головченко, Қозоғистон Республикаси Бош вазири О.Бектенов, Россия Федерацияси Ҳукумати Раиси М.Мишустин, Қирғиз Республикаси Вазирлар Маҳкамаси раиси А.Жапаров иштирок этди. Куба Бош вазири М.Крус видео мурожаат билан қатнашди. Озарбайжон Республикаси Бош вазири А.Асадов фахрий меҳмон сифатида нутқ сўзлади.
Мажлисда Ўзбекистон Республикаси Бош вазири Абдулла Арипов сўзга чиқди.
Ўзбекистон ЕОИИда кузатувчи сифатидаги даврида аъзо давлатлар билан кўп томонлама иқтисодий ҳамкорликни жадал ривожлантираётгани, янги ўсиш нуқталарини шакллантириш борасида изчил ишлар амалга оширилаётгани таъкидланди.
Ўзбекистон савдо ва юк ташишни рақамлаштириш, электрон тижорат ва иқлим масалалари бўйича соҳавий лойиҳа ҳамда дастурларга қўшилгани маълум қилинди.
Ҳозирги кунда минтақа мамлакатлари иқтисодиётининг рақобатдошлигидан фаол фойдаланиш муҳим аҳамиятга эга экани алоҳида таъкидланди.
Бунда Ўзбекистон Республикаси Президенти Шавкат Мирзиёевнинг май ойида Олий Евроосиё иқтисодий кенгашининг ўтган йиғилишида илгари сурган ташаббусларини ҳаётга татбиқ этиш муҳимлиги қайд этилди.
Йиғилишда Ўзбекистон томони ЕОИИ мамлакатлари билан савдодаги тўсиқлар ва чекловларни ўзаро бартараф этиш, санитария, фитосанитария ва ветеринария назоратининг ахборот тизимларини интеграциялаштириш, “Шимол-Жануб” транспорт коридорини Жанубий ва Жануби-Шарқий Осиё ҳамда Яқин Шарқ бозорлари томон йўналтириш, саноат кооперациясини янада ривожлантиришга қаратилган “Йўл харитаси”ни биргаликда ишлаб чиқиш, Самарқанд шаҳрида ЕОИИ ишбилармонлар кенгашининг биринчи қўшма форумини ўтказишни таклиф қилди.
Шунингдек, “яшил” коридор тизимларини кенгайтириш, қўшма агросаноат кластерлари ва логистика марказларини ташкил этиш, “яшил” ва сувни тежайдиган технологияларни жорий этиш, иқлим ўзгариши оқибатларини бартараф этишда умумий ёндашувлар ва яқин ҳамкорликни ишлаб чиқиш масалаларига ҳам алоҳида эътибор қаратилди.