Наманган вилояти ҳокимлиги

"Наманган тажрибаси" сифатида вилоятдаги бўш ва фойдаланилмай келинаётган жами 820,8 гектар ер майдонларида 72 та кичик саноат зоналари, шундан 127 гектар ер майдонда 18 та ёшлар саноат ва тадбиркорлик зоналари ташкил этилган. Ҳозирда саноат зоналарига жойлаштирилган 1282 та тадбиркорлик субъектларининг 1063 таси ўз иш фаолиятини йўлга қўйган бўлиб, бунинг натижасида 60 мингга   яқин янги иш ўринлари яратилди. 
Мулоқотда ҳудуддаги "Кушон", "Ёшлар" ҳамда "Юксалиш" кичик саноат зоналарида фаолият олиб бораётган тадбиркорлар иштирок этиб, коммунал соҳалар: ичимлик суви, электр, газ таъминоти, йўл инфратулизмаси, кадастр, солиқ ва бошқа масалаларга оид мурожаатларини билдирдилар.       

Наманган вилояти ҳокими Шавкатжон Абдураззоқов уларнинг ҳар бирини эътибор билан тинглаб,  кўтарилган муаммоларнинг аксариятига шу ернинг ўзида ечим топди. 

Шунингдек, ижроси муддат талаб этадиган мурожаатлар назоратга олиниб, мутасаддиларга тегишли кўрсатмалар берилди. 

Учрашувдан сўнг бир қатор тадбиркорларнинг муаммолари жойига чиққан ҳолда ўрганилди ва ҳал этиш чоралари кўрилди. 

Наманган вилояти ҳокимлиги Ахборот хизмати.