"Янги Наманган шаҳарчаси" қурилиши жадаллашмоқда
2025-03-11 11:30:00 / Янгиликлар
Хабарингиз бор, муҳтарам Президентимизнинг ўтган йили 25-26 март кунлари Наманган вилоятига ташрифлари чоғида “Янги Наманган шаҳарчаси” қурилишининг келгуси босқичлари тақдимот қилинган эди. Орадан ўтган қисқа вақт ичида бу ерда катта ҳажмдаги бунёдкорликлар амалга оширилмоқда.
Лойиҳа доирасида 50 мингдан ортиқ хонадонга эга 721 та турар жой, 28 та умумтаълим мактаби, 24 та болалар боғчаси, 5 та замонавий шифохона, шунингдек, олий таълим муассасаси, кутубхона, бизнес марказлари ва ўнлаб маиший хизмат кўрсатиш объектлари барпо этилиши режалаштирилган. Айни пайтда шаҳарчанинг инфратузилмасини такомиллаштириш ишлари жадаллик билан олиб борилмоқда.
Эътиборлиси, жараёнга бунёдкорлик ишларида катта тажрибага эга хориж компаниялари ҳам жалб этилмоқда.
Бугун Наманган вилояти ҳокими Шавкатжон Абдураззоқов "Янги Наманган шаҳарчаси" қурилишида иштирок этаётган "NAMANGAN QIANXING INVESTMENT" хорижий корхонаси вакиллари билан учрашди.
Ўзаро мулоқотда қурилиш жараёнларини тезлатиш, объектни белгиланган муддатда фойдаланишга топшириш, бунда сифатга алоҳида эътибор қаратиш масалалари муҳокама қилинди.
Шунингдек, ҳамкорликни янада кенгайтириш ва ривожлантириш юзасидан келишиб олинди.
Наманган вилояти ҳокимлиги Ахборот хизмати