65-халқаро "Гуллар фестивали"нинг нуфузли тадбирлари давом этмоқда: Наманганда MICE туризм форуми ўтказилди.
2026-06-12 14:20:00 / Янгиликлар
Форумда 10 га яқин мамлакатдан ташриф буюрган 30 дан ортиқ туризм соҳаси вакиллари, хорижий ҳамкорлар, инвесторлар, туроператорлар ҳамда маҳаллий тадбиркорлар иштирок этди.
Тадбирда дастлаб Наманган вилояти ҳокимининг ўринбосари Ботиржон Нуритдинов сўзга чиқиб, бугунги кунда Наманган вилояти зиёрат, гастрономик, тиббий, экологик, тоғ ва шоппинг туризми каби йўналишларда жадал ривожланаётганини таъкидлади.
Шунингдек, анъанавий тарзда ўтказиб келинаётган "Гуллар фестивали", вилоятнинг бой маданий мероси, қулай географик жойлашуви ва меҳмондўстлик анъаналари халқаро форумлар, кўргазмалар ўтказиш учун кенг имконият яратаётганини қайд этди.
Форум доирасида бўлиб ўтган бизнес музокаралари ва B2B учрашувлари натижасида маҳаллий ва хорижий компаниялар ўртасида 150 дан ортиқ шартнома ва ўзаро ҳамкорлик келишувлари имзоланди. Бу эса Наманган вилоятининг туризм соҳасида халқаро ҳамкорлик майдони сифатидаги нуфузи тобора ошиб бораётганини кўрсатди.