Наманган вилояти ҳокимлиги

Наманган вилояти ҳокимлигида Туркиянинг TIGTurkey инвестиция агентлиги президенти Хайреддин Туран, вице-президент Меҳмет Селим Арвас, Наманганнинг Туркиядаги туризм элчиси, эбру санъати устаси Аҳмет Чоктан ва таниқли ёзувчи, Қирғиз Республикасида хизмат кўрсатган маданият арбоби, Қирғизистон, Ўзбекистон, Озарбайжон ёзувчилар уюшмаси аъзоси Бегижон Аҳмедовлар билан учрашув бўлиб ўтди.

Вилоят ҳокими меҳмонларни самимий қутлаб, нафосат ва гўзаллик байрамининг илк кунидаги иштирок учун ўз ташаккурини билдирди.

Учрашувда савдо-иқтисодий, инвестиция, туризм ва маданий масалалар муҳокама марказида бўлди.

- Бизнинг компания саноат, қурилиш, туризм, юқори технологиялар билан шуғулланувчи ўнлаб ширкатларни ўз ичига олади. Бундан ташқари Туркия, Кўрфаз даввлатлари, Африка мамлакатларининг йирик компаниялари бирлаштирувчи уюшмаларимиз бор. Наманганнинг бир неча кичик саноат зоналарида бўлдик. Ишлаб чиқарувчиларнинг салоҳияти юқори эканлигига амин бўлдик, - деди Хайреддин Туран.

Вилоят ҳокими ўзаро алоқаларнинг муштарак жиҳатлари бисёр эканлигини таъкидлаб, ҳамкорликни тўла қўллаб-қувватлашини маълум қилди.

- Наманган халқаро "Гуллар фестивали" билан дунёни лол қилди. Мана икки кундирки биз бунга амин бўлдик. Ўзбекистон деганда кўпчилик кўзи олдига Самарқанд ва Бухоро келган. Ҳозир бу сафга Наманган ҳам қўшилди. Ўша машҳур иккиликни бугун бемалол учликка айлантирса бўлади:

Самарқанд сайқали рўйи замин аст,
Бухоро қуввати исломи дин аст,
Намангон чароғи ҳусни жаҳон аст!
(Намангон жаҳон ҳуснининг машъалидир!).

Наманганни дунё рекорди билан табриклаймиз, - деди ёзувчи Бегижон Аҳмедов.

Аҳмет Чоктан ва Селим Арвас туризм, медиа, савдо-инвестиция бўйича бир неча таклифларини билдирдилар.

Самимий ўтган мулоқотда фестивални янада бойитиш, ҳамкорликни мустаҳкамлаш юзасидан фикр-мулоҳазалар алмашилди.

Наманган вилояти ҳокимлиги
Ахборот хизмати