Орзиқиб кутилаётган 65-халқаро "Гуллар фестивали" тобора яқинлашмоқда: тайёргарлик ишлари жойига чиққан ҳолда муҳокама қилинди.
2026-05-01 20:55:00 / Янгиликлар
Наманган вилояти ҳокими Шавкатжон Абдураззоқов бугун фестивал олдидан олиб борилаётган ишлар билан яқиндан танишди. Хусусан, Гиннеснинг рекордлар китобидан жой олиш учун бошланган “Бир ой давомида жамоа томонидан экилган энг кўп гуллар” номинацияси бўйича рекорд натижа қайд этиш борасидаги саъй-ҳаракатлар кўздан кечирилди.
Шунингдек, Заҳириддин Муҳаммад Бобур номидаги маданият ва истироҳат боғи ҳудудидаги ажратилган майдонларда турли композиция ва дизайнлар яратиш жараёни ўрганилди. Боғ майдони тўлиқ равишда гул экиш жараёнларига мослаштирилиб, фестивал доирасида намойиш этиладиган композициялар учун замин ҳозирланди. Вилоят раҳбари тақдим этилган лойиҳа таклифларини кўздан кечириб, уларнинг эстетик жиҳатлари ва дизайн ечимларига алоҳида урғу берди.
Бу йилги фестивалда нафақат анъанавий гул безаклари, балки инновацион ландшафт дизайн элементлари ҳам кенг ўрин олиши кутилмоқда.
Ўрганиш якунида вилоят ҳокимига фестивал кунлари жамоат тартибини сақлаш бўйича кўрилаётган чора-тадбирлар ҳақида ахборот берилди. Хусусан, автопарад йўналиши, меҳмонлар учун хавфсиз ва қулай муҳит яратиш масалалари муҳокама қилинди.
Вилоят раҳбари хавфсизликни таъминлаш бўйича барча зарур тадбирларни ишлаб чиқиш, автотураргоҳлар сонини кўпайтириш, фестивал иштирокчилари сайр қиладиган майдонларни кенгайтириш, ички имкониятларни ишга солиш юзасидан мутасаддиларга топшириқ ва кўрсатмалар берди.
Наманган вилояти ҳокимлиги
Ахборот хизмати