Наманган вилояти ҳокими Шавкатжон Абдураззоқов бошчилигидаги ишчи гуруҳ Учқўрғон туманида жойлашган, айни пайтда фаолияти тўхтаб қолган “Учқўрғон ёғ” акциядорлик жамияти муаммоларини ўрганди.
2026-04-08 19:20:00 / Янгиликлар
Шунингдек, корхонани қайта тиклаш имкониятлари, мавжуд қувватлардан самарали фойдаланиш, инвесторларни жалб этиш, замонавий технологияларни жорий қилиш орқали ишлаб чиқаришни қайта йўлга қўйиш масалалари юзасидан масъуллар иштирокида муҳокамалар ўтказилди.
Ўрганишлар натижасида мутасадди раҳбар ва ташкилотларга корхонанинг фаолиятини қайта тиклаш, уни барқарор ишлашини таъминлаш ҳамда янги иш ўринлари яратиш бўйича аниқ вазифалар юклатилди. Айниқса, маҳсулот турларини кенгайтириш, рақобатбардошликни ошириш ва ички ҳамда ташқи бозорларга чиқиш имкониятларини қайта кўриб чиқишга алоҳида эътибор қаратилди.
Йиғилиш якунида “Учқўрғон ёғ” АЖ фаолиятидаги мавжуд муаммоларни босқичма-босқич ҳал этиш мақсадида аниқ чора-тадбирларни ўз ичига олган “йўл харитаси” ишлаб чиқиш бўйича масъулларга тегишли топшириқлар берилди.