Ўзбекистон Республикаси Ички ишлар вазири генерал-лейтенант Пўлат Бобожоновнинг 1 октябрь – Ўқитувчи ва мураббийлар куни муносабати билан байрам табриги
2024-10-01 06:30:00 / Янгиликлар
Қадрли устоз-мураббийлар!
Таълим-тарбия соҳасининг жонкуяр, фидойи ходимлари ва фахрийларини барчамиз энг эъзозлаган байрамлардан бири – Ўқитувчи ва мураббийлар куни билан самимий табриклайман.
Бугунги кунда ички ишлар органларини чуқур билим ва салоҳиятга эга, етук кадрлар билан таъминлаш, ҳар томонлама баркамол ёшларни тарбиялаш, уларга касб сирларини ўргатиш, ватанпарвар, жасур ва садоқатли юрт ўғил-қизларини камолга етказишдек масъулиятли вазифани тизимда фаолият юритаётган устоз ва мураббийларимиз шараф билан адо этиб келмоқдалар.
Муҳтарам Президентимиз Шавкат Миромонович Мирзиёев: “Муаллимнинг обрў-эътибори – бу аввало, миллатнинг, бутун халқнинг обрў-эътиборидир. Шу боис, биз кейинги йилларда ўқитувчи ва мураббийларнинг жамиятимиз ҳаётидаги ўрни ва таъсирини кучайтириш, таълим тизимини замон талаблари асосида ташкил этиш бўйича улкан ислоҳотларни амалга оширмоқдамиз” – дея таъкидлаганлар.
Бу борада юртимиз таълим соҳасини тубдан ривожлантириш, ўқитувчи ва мураббийларнинг нуфузини янада юксалтириш, уларга халқаро стандартлар асосида шароит ва имкониятлар яратиб бериш, ислоҳотлар орқали эса, Ўзбекистонда янги Уйғониш даври, яъни Учинчи Ренессанс пойдеворини барпо этиш сари жадал бормоқдамиз.
Таълим соҳасида меҳнат қилаётган барча профессор-ўқитувчилар қаторида ички ишлар органлари тизимида фаолият кўрсатаётган азиз устоз-мураббийларимиз ҳам ўзининг бор куч ва салоҳиятини, билим ва тажрибасини сафарбар этиб, юртимизда амалга оширилаётган ислоҳотлар ривожига муносиб ҳисса қўшишларига ишонамиз.
Дарҳақиқат, бугунги ислоҳотлар шиддати, кўзланган мақсадлар рўёби устоз ва мураббийлардан ҳам чинакам ватанпарварликни, улкан фидойиликни талаб қилади. Энг шарафли касб эгаси бўлган ўқитувчи ва мураббийлар ҳамиша эътибор ва эъзозга муносибдир.
Фурсатдан фойдаланиб, ички ишлар органларида илм-фан, таълим-тарбия соҳаларини ривожлантириш, ёшларга замон талаблари асосида билим бериш, уларда юксак маънавий-ахлоқий фазилатларни камол топтириш, ходимларимизни қасамёдга садоқат руҳида тарбиялаш ишларига камарбаста бўлаётган фахрийларимиз, азиз устоз ва мураббийларимизни ушбу айём билан табриклаб, уларга узоқ умр, сиҳат-саломатлик, бахт-саодат, келгуси фаолиятларида улкан зафарлар тилайман.
Вазир генерал-лейтенант П.Р.Бобожонов