Халқаро алоқалар. Ўзар ҳамкорлик янада ривожланмоқда
2024-09-21 18:00:00 / Янгиликлар
Икки қардош миллат-ўзбек ва турк халқларининг урф-одатлари, дини ва маданияти бир-бирига жуда яқин. Азалий дўстлик ва уйғун маданий алоқалар бу икки миллатни мустаҳкам боғлаб туради. Сўнгги йилларда Ўзбекистон ва Туркия ўртасида турли соҳалардаги алоқаларни янада ривожлантиришга қаратилган саъй-ҳаракатлар икки давлат муносабатларини янги босқичга олиб чиқмоқда.
Яқинда ички ишлар вазири, генерал-лейтенант Пўлат Бобожонов Ўзбекистонга расмий ташриф билан келган Туркия Республикаси ички ишлар вазири жаноб Али Ерликая бошчилигидаги делегация билан учрашув ўтказди.
Ушбу учрашув Президентимизнинг жорий йил 6-7 июнь кунлари Туркия Республикасига расмий ташрифи давомида эришилган келишувларга мувофиқ амалга оширилди.
Ички ишлар вазирлигида бўлиб ўтган тадбирда икки давлат ички ишлар вазирликларининг ўзаро алоқалари кенгайиб, трансмиллий жиноятларга қарши курашиш ҳамда жамоат хавфсизлигини таъминлаш бўйича тизимли ҳамкорлик янги босқичга кўтарилгани, ахборот ва ўзаро тажриба алмашиш ҳамда кадрлар малакасини ошириш каби масалалар амалга оширилаётгани таъкидланди.
Жумладан, профессионал кадрларни тайёрлаш борасида 2018 йилда Туркия Полиция академияси ҳамда 2022 йилда Жандармерия ва соҳил хавфсизлиги академияси ва Ўзбекистон ИИВ Академияси ўртасида имзоланган меморандумлар асосида Туркия ҳуқуқни муҳофаза қилиш идоралари ўқув юртларининг профессор-ўқитувчилари давлатимизда соҳа курсантларини тайёрлашда, шунингдек, магистратура тингловчиларига замонавий билим бериш жараёнларида фаол қатнашаётгани таълим йўналишидаги алоқалар мустаҳкамланаётганидан далолат эканлиги яна бир бор эътироф этилди.
Шунингдек, ҳамкорликнинг алоҳида йўналиши бўлган кибержиноятчиликка қарши самарали курашиш масаласи ҳам ўртага ташланиб, бу борада икки томонлама ҳамкорликни кучайтириш ҳамда доимий равишда ўзаро тажриба алмашиб бориш муҳим эканлигига урғу берилди.
Бундан ташқари, томонлар терроризм ва экстремизм, одам савдоси, гиёҳвандлик моддаларининг ноқонуний савдоси ҳамда бошқа турдаги трансмиллий жиноятларга қарши курашишда ҳамкорликни кучайтириш, кибержиноятларга қарши курашиш ва рақамли криминалистика йўналишида ички ишлар органлари ходимлари учун махсус ўқув курсларини ташкил этиш, Вазирлик таркибида янги ташкил этилган Криминология тадқиқот институти билан Туркиянинг ички ишлар вазирлиги ва Жандармериясига қарашли илмий тадқиқот марказлари ўртасида ўзаро ҳамкорликни йўлга қўйиш каби муҳим масалалар муҳокама қилинди.
Учрашув якунида ҳамкорликни янада ривожлантириш борасида истиқболли вазифалар белгилаб олинди.
Ташриф доирасида турк қардошларимиз пойтахтимиз ҳамда Самарқанд вилоятида туристик объектларнинг хавфсизлигини таъминлаш фаолияти билан ҳам яқиндан танишишди.
©️ “Postda” газетаси.