Ўзбекистон Республикаси Ички ишлар вазири генерал-лейтенант Пўлат Бобожонов иштирокида ички ишлар органлари ходимларининг оилаларига янги замонавий хонадонларнинг калитларини тантанали топшириш маросими бўлиб ўтди
2024-07-20 22:00:00 / Янгиликлар
Мамлакатимизда ҳукм сураётган тинчлик ва барқарорлик, халқимизнинг бунёдкорлик салоҳияти ва ғайрат-шижоати, муҳтарам юртбошимизнинг адолатли ички ва ташқи сиёсати туфайлидир.
Шу жумладан, тарихан қисқа давр ичида ички ишлар органларини ислоҳ қилиш, барча ходимларнинг кундалик хизмат фаолиятини «Халқ манфаатларига хизмат қилиш» ғояси асосида ташкил этиш бўйича улкан ишлар амалга оширилмоқда.
Шу билан бирга уларни ижтимоий қўллаб-қувватлаш, ходимлар учун муносиб иш ва яшаш шароитларини яратишга алоҳида эътибор қаратилаётганини ҳам эътироф этиш лозим.
Юртбошимизнинг 2017 йил 29 ноябрь кунидаги 3413-сонли ҳамда Вазирлар Маҳкамасининг 354-сонли қарорларига асосан ички ишлар органлари ходимларини ҳар томонлама ижтимоий ҳимоя қилиш, ўз навбатида уларни имтиёзли уй-жойлар билан таъминлаш борасидаги чора-тадбирлар белгилаб берилган эди.
Айни мақсадда тизимда хизмат қилаётган ходимларнинг турмуш шароитини яхшилаш бўйича бир қанча дастурлар ҳаётга татбиқ этилди.
Жумладан, жорий йилнинг ўтган даври мобайнида 16 000 нафарга яқин ходимлар, ҳарбий хизматчилар ва фахрийларга турли хил ижтимоий ёрдамлар кўрсатилган бўлса, айни пайтда 206 нафар ички ишлар органлари ходимлари имтиёзли равишда пойтахтимизнинг Мирзо Улуғбек туманидаги янги замонавий кўп қаватли хонадонларга эга бўлишди.
Хонадонларни тантанали топшириш маросимида Ички ишлар вазири генерал-лейтенант Пўлат Бобожонов сўзга чиқиб, мазкур қувончли кун билан самимий муборакбод этиб, бу каби ғамхўрлик ва эътиборга жавобан масъулият ва садоқат билан хизмат қилиш лозимлигини таъкидлаб ўтди.
Шундан сўнг ходимларга янги хонадонлар калитлари тантанали тарзда топширилди.
Тадбир давомида шунингдек, мазкур кўп қаватли турар жой комплексини қуришда жонбозлик кўрсатган уста қурувчиларга вазирлик томонидан миннатдорчилик билдирилди.
Вазирлик раҳбарияти, фахрий ходимлар тадбир давомида ходимларнинг янги хонадонларида бўлиб, яратилган имконият ва шароитлар билан танишишди.
Хонадон вакиллари билан самимий мулоқотда бўлиб, уларнинг қувончига шерик бўлишди.
Мухтасар айтганда, ички ишлар органлари ходимлари учун амалга оширилаётган бу каби ижтимоий қўллаб қувватлаш уларнинг келгусидаги фаолиятларида ўз хизмат вазифасига сидқидилдан ёндашишларида ҳамда она юртга садоқат билан хизмат қилишларида муҳим омил бўлиб хизмат қилади.