Ҳафтанинг ҳар душанба кунлари Бухоро вилояти ҳокими раҳбарлигида, ҳафтанинг чоршанба ва жума кунлари ҳокимнинг биринчи ўринбосари ҳузурида ижро интизоми ҳолати танқидий муҳокама қилиб келинмоқда. Ўзбекистон Республикаси Президенти, Президент Администрацияси ҳамда Вазирлар Маҳкамасининг ҳужжатлари ва топшириқлари ижроси кунбай, соатбай қатъий назорат қилинмоқда.

«Ijro.gov.uz» ижро интизоми идоралараро электрон тизими киритилган қонунчилик ҳужжатлари ва топшириқлари Адлия вазирлиги, Вазирлар Маҳкамаси ҳамда Ҳисоб палатаси томонидан экспертизадан ўтказилганидан сўнг назоратдан ечилиши белгиланганлигини инобатга олган ҳолда, вилоят ҳокимлиги аппаратида ушбу топшириқлар белгиланган муддатларда ва пухта бажаралишини таъминлаш мақсадида олдиндан огоҳлантириш тизими йўлга қўйилган.

Яъни ҳар ҳафта 2 маротаба келгуси ойнинг якунига қадар ижро муддати келадиган топшириқлар рўйхати эслатма сифатида ҳоким ўринбосарлари, маслаҳатчилари, бўлинма раҳбарларига ҳамда туман ва шаҳар ҳокимликларига етказилмоқда.

Ҳокимлик аппаратида қонунчилик ҳужжатлари ва топшириқлари ижроси ҳақидаги маълумотларни ижро муддати якунланишини кутмасдан электрон дастурга олдиндан киритиб бориш масаласига алоҳида эътибор берилмоқда.
Вилоят ҳокимлиги аппарати масъул ходимлари томонидан ҳар ойда битта туман ва шаҳарда ҳамда вилоят бошқарма, корхона ва ташкилотларида қонунчилик ҳужжатлари ва топшириқлари ижроси мақсадли ўрганилмоқда. Жумладан, жорий йилнинг июнь ойида вилоят Давлат активларини бошқариш агентлигининг вилоят ҳудудий бошқармасида, август ойида Бухоро шаҳар ҳокимлигида қонунчилик ҳужжатлари ва топшириқлари ижроси ҳолати ўрганилиб, топшириқлар ижросини ташкил этишда амалий ёрдам кўрсатилди.  

2025 йилнинг 9 ойи давомида вилоят ҳокимлиги аппаратида ижро интизомининг ҳолати 77 маротаба муҳокама қилинган. 
2023 йил 21 ноябрь куни Президентимиз раҳбарликларида кенгайтирилган тарзда ўтказилган видеоселектор йиғилишида ижро интизомини мустаҳкамлаш бўйича берилган топшириқлардан келиб чиқиб, ҳар бир топшириққа «темир интизом» билан жиддий ёндошиб, Ўзбекистон Республикаси Президенти ва Ҳукуматнинг топшириқларини ўз вақтида, самарали ҳамда тўлиқ бажаришда вилоят ҳокимининг ўринбосарлари, вилоят корхона ташкилотлар раҳбарлари, туман ва шаҳарлар ҳокимларининг роли ҳамда шахсий жавобгарлигини ошириш чоралари кўрилиб, сусткашликка йўл қўйган масъул раҳбарларга нисбатан интизомий жазо чоралари кўриб борилмоқда.

«Ijro.gov.uz» ижро интизоми идоралараро ягона электрон тизимида 2025 йилнинг ўтган даври давомида вилоятга дахлдор 3623 та топшириқ келиб тушган бўлиб (2024 йилга нисбатан 474 тага ёки 13.1 % га ошган), ушбу топшириқларнинг 1612 тасида вилоят ҳокимлиги асосий ижрочи ҳамда 2011 тасида ҳамижрочи сифатида белгиланган.
Ушбу топшириқларнинг 3615 таси (99,8%)нинг ижроси таъминланиб назоратдан ечилган. Қолган 8 та топшириқда вилоят ҳокимлиги ҳамижрочи сифатида белгиланган бўлиб, бугунги кунда ушбу топшириқларнинг ижросини таъминлаш чоралари кўрилмоқда. 

Жорий йилнинг центабр ойида «Ijro.gov.uz» ижро интизоми идоралараро ягона электрон тизимида Президентимизнинг вилоят ҳокимлигига дахлдор 176 та топшириқлари келиб тушган бўлиб, барчасининг ижроси таъминланди. 

Шунингдек, ижро интизоми идоралараро ягона электрон тизимининг Вазирлар Маҳкамаси топшириқлари модулида Ҳукуматимизнинг вилоят ҳокимлигига дахлдор 179 та топшириғи келиб тушган бўлиб, улардан 174 тасининг ижроси таъминланди ҳамда 5 та топшириқнинг ижросини таъминлаш чоралари кўрилмоқда.  

Жорий йилнинг октабр ойида Президентмизнинг вилоятга дахлдор 186 та ҳамда Вазирлар Маҳкамасининг 144 та топшириқларининг ижро муддати белгиланган бўлиб, мазкур топшириқларнинг ижросини таъминлаш бўйича кунбай календарь график ишлаб чиқилди. Вилоят ҳокими раҳбарлигида 2025 йилнинг 26-центабрида ўтказилган йиғилиш муҳокама қилиниб, ҳар бир ҳоким ўринбосарлари кесимида «Йўл харита»лари ишлаб чиқилиб, тасдиқланди ҳамда ижрога қаратилди.

Октабр ойида Ўзбекистон Республикаси Президентининг 186 та топшириқларидан 34 тасининг ҳамда Ҳукуматнинг 144 та топшириқларидан 20 тасининг ижроси барвақт таъминланди ҳамда қолган топшириқлар ижросини белгиланган муддатларда ва сифатли таъминлаш бўйича барча зарурий  чоралар кўрилмоқда.

Вилоятда Президентимизнинг ҳамда Вазирлар Маҳкамасининг октабр ойидаги қолган топшириқлари ижросини белгиланган муддатларда ва сифатли таъминлаш бўйича барча зарурий  чоралар кўрилмоқда.

Умид Қўшшаев,
Вилоят ҳокимлиги Ижро интизоми назорати бўлими бошлиғи