Бухоро вилояти ҳокимлиги

Мазкур қарор асосида вилоятимиз маҳалла ва қишлоқларида ўнлаб ижтимоий соҳа иншооти, аҳоли вакиллари кундалик ташвиш-эҳтиёжларини қондириш, уларга савдо-маиший ва бошқа хизматлар кўрсатиш орқали турмуш тарзи яхшилашни кўзда тутган лойиҳалар рўёбга чиқарилаётгани қувонарли, албатта. Худди шундай, Шофиркон туманидаги “Мирзоқул” маҳалла фуқаролар йиғинида уч қаватли, замонавий хизмат кўрсатиш маркази қуриб фойдаланишга топширилди.

Ҳудуди 20 сотих ер майдонида бунёд этилган бу марказ маҳалла аҳолиси учун ҳақиқий универсал масканга айланди.

Бинода аҳоли учун ижтимоий, маиший ҳамда маъмурий хизматлар кўрсатиш имконияти яратилмоқда. Жумладан, маҳалла марказининг ерости қаватида мева-сабзавотларни саралаш ва қадоқлаш бўйича махсус хона ва ёрдамчи хоналар ташкил этилган. 

Биринчи қаватда эса аёллар ва эркаклар учун алоҳида сартарошхона, гўзаллик салони, дорихона, банк вакиллари учун, яна маҳалла маъмурияти, раиси, ҳоким ёрдамчиси, хотин-қизлар фаоли, ёшлар етакчиси ва профилактика инспектори учун хизмат хоналари шай қилинган. Айни пайтда бу иншоотда давлат хизматлари маркази, қандолат цехи ва замонавий савдо дўкони ҳам аҳолига хизмат кўрсатади. 

Бинонинг иккинчи қавати ўқув ва касб-ҳунар йўналишларига ихтисослаштирилган. Бу ерда касбга йўналтириш маркази, кимёвий тозалаш хизмати, шунингдек, замонавий фитнес зали ташкил этилган. Учинчи қаватда эса тикувчилик цехи, маиший техника устахонаси ва ёшлар маркази жойлашган бўлиб, бу секциялар ҳам аҳоли, айниқса, ёшлар бандлигини таъминлашда муҳим аҳамият касб этади.

Янги хизмат кўрсатиш марказини фойдаланишга топширилишида туман ҳокими Алишер Файзиллоев, маҳалла нуронийлари ва жамоатчилик вакиллари иштирок этдилар. Тадбирда сўзга чиққанлар мазкур лойиҳа аҳамияти, унинг маҳалла ҳаётидаги ўрни, яратилаётган қўшимча иш ўринлари хусусида тўхталдилар. Иншоотнинг рамзий лентаси қирқилгач, йиғилганлар замонавий андозада тикланган маҳалла марказида яратилган шарт-шароит билан яқиндан танишдилар. 

Вилоят ҳокимлиги матбуот хизмати