Бухоро вилояти ҳокимлиги

Уч-тўрт йил бурун қарийб 500 нафар ишчи-мутахассис меҳнат қилиб келган,  Туркия, Япония ва Италия технологияси асосида жиҳозланган бу корхонада ҳар куни 5 мингдан зиёд замонавий бичимдаги маҳсулот тайёрлантгани маҳаллий бюджетга ҳам муносиб улуш бўлиб қўшилган. Корхона таъсисчиларидан бири Аъзамжон Норқўзиевнинг айтишича, корхонанинг юз фоиз тайёр маҳсулоти экспортга йўналтирилган. Тайёр кийим-кечак айирбошлаш ҳисобидан бу ердаги меҳнат жамоасининг моддий манфаатдорлиги ошиб борган. 
Вилоят ҳокими Ботир Зарипов туманнинг “Дўстлик” МФЙ Ғафур Ғулом кўчасидаги “Gʻayrat Chodak" МЧЖда бўлиб, корхона фаолияти, жинси матосидан шим тикиб тайёрлаш лойиҳаси билан танишди. 

2019 йил январ ойидан иш бошлаган фабрикада бугунга келиб 200 дан ортиқ ишчи-мутахассис меҳнат қилаётган бўлса, табиийки, ишчи сони билан бирга маҳсулдорлик ҳам кескин камайган. Ички бозорга сифатли маҳсулот етказиб бериш ҳисобидан ўтган йили корхона маҳаллий бюджетга 2,5 миллиард сўмга тенг қўшимча тушум киритган. Йил давомида эса “Gʻayrat Chodak" МЧЖ жамоаси 300 минг дона женси шим тайёрлаб етказиши лозим. 

Вилоят ҳокими Ботир Зарипов Вобкент тумани, “Паноб” МФЙ даги Янги ҳаёт қишлоғида фаолият юритаётган “Taraqqiyot shoes” оёқ кийими ишлаб чиқариш корхонасида бўлди.

—Ярим гектар майдонни эгаллаган мазкур тадбиркорлик корхонаси умумий қиймати 100 минг АҚШ доларига тенг бўлиб, шундан 85 минг АҚШ доллари тижорат банки кредит сармоясидир,—дейди корхона раҳбари Сулаймон Турдиев.—Йилига 12 минг дона тайёр оёқ кийими тикиб тайёрлашни зиммамизга олганмиз. Ишлаб чиқариш учун жиҳозлар ва асбоб-ускуналар Хитой давлатидан олиб келинган. Ҳозирда 10 нафар ишчи меҳнат қилаётган корхонада йил якунига бориб буюртмачиларга етказиб бериладиган маҳсулот айирбошлашдан маҳаллий бюджетга 6 миллиард сўм улуш қўшиш мақсад қилинган. 
 
Икки йил бурун баҳор ойларидан Вобкент тумани "Работохун" маҳалла фуқаролар йиғинида фаолият бошлаган "Lux Pet Plast" масъулияти чекланган жамияти томонидан ўтган йилда  умумий қиймати 1,8 миллиард сўмни ташкил этган ПЕТ капсула ишлаб чиқариш линияси лойиҳаси амалга оширилган. Аҳамиятли жиҳати, бугунга келиб унда 10 нафар ишчи бандлиги таъминланмоқда. Бунинг учун ўтган йилда тадбиркор томони шахсий жамғармасидан 8 миллиард сўм, хорижий кредит линияси ҳисобидан 200 минг АҚШ доллари миқдорида маблағ сарфланган.

Мазкур корхона томонидан икки йилдирки, умумий қиймати 6,7 миллиард сўм, шундан ўз маблағи ҳисобидан 5,5 миллиард сўм, хорижий кредит линияси ҳисобидан 107 минг АҚШ долларини ташкил этган турли ўлчамдаги пластмасса идишлари ишлаб чиқарилиб, буюртмачиларга етказилмоқда.

— Туман марказига яқин маҳалланинг Бинокор кўчасидан қарийб 70 сотих қаровсиз ётган ер майдонини олиб, 2020 йилдан цех қурилишини бошлаганмиз, – дейди "LUX PET PLAST" МЧЖ раҳбари Адҳам Илёсов. — Бинони Туркия ва Хитойнинг махсус термопласт ускуна ва қолиплари билан жиҳозладик. Бунинг учун «Капталбанк» вилоят филиали билан яқин ҳамкорликда иш юритиб, биринчи босқичда 300 минг АҚШ долларига тенг кредит маблағини расмийлаштирганмиз.

Ҳозирда мазкур корхонага Хитой давлатидан умумий қиймати 1 миллион АҚШ долларини ташкил этган махсус дастгоҳ ва ускуналар келтириб ўрнатилган. Елим идиш, яъни ПЭТ капсула ишлаб чиқариш линияси турли ичимликлар ва маиший–кимёвий моддаларни қадоқлаш учун ишлатилади. Корхона маъмурияти эса ҳадемай тўла қувватда, йилига 1,2 миллион АҚШ доллари миқдорида, 400 тоннага тенг ҳажмдаги товар ишлаб чиқариш ҳаракатида.  

Мазкур корхоналар фаолияти билан жойида танишган вилоят ҳокими Ботир Зарипов масъуллар, шунингдек, ҳудуддаги фуқаролар йиғинлари маъмурияти, маҳаллалар фаоллари билан мулоқот қилиб, ишлаб чиқариш субъектларида дуч келинаётган ташвиш ва муаммолар, банк-кредит муносабатлари, хом ашё хариди ва таъминоти, ишлаб чиқаришни барқарор изга солиш, кам даромадли оилаларни қўллаб-қувватлашга доир қатор тавсия ва топшириқларни берди.   
  
Вилоят ҳокимлиги матбуот хизмати