Бухоро шаҳри: «Ҳавзи нав» маҳалласида Гулрух Комилова ҳам ширинликлар тайёрламоқда
2025-04-11 16:50:00 / Янгиликлар
Шундайлар борки, иродаси туфайли улар ҳеч нарсага қарамасдан ҳаракат ва орзу-интилишдан тўхтамай, фақат олдинга интилади. Айни кунда вилоятимиз маҳалла ва қишлоқларида ҳам шундай эҳтиёжманд, ижтимоий муҳофазага олинган фуқаролар турмуш тарзи яқиндан ўрганилиб, улар турмуш шароити, меҳнат лаёқати, хоҳиш-истагига мос меҳнат шароитини яратиб беришга эътибор қаратилмоқда.
Жумладан, вилоят марказидаги "Ҳавзи-нав" маҳалла фуқаролар йиғинида ҳам бу борада қатор сезиларли ишларга гувоҳ бўлиш мумкин. Бу маҳалланинг асосий ривожланиш «драйвери»—ҳунармандчилик, ишлаб чиқариш ва савдо-тижорат иши йўналишлари. Ҳудудда фаолият юритаётган моҳир ҳунармандлар талайгина.
Берилаётган имкониятлардан унумли фойдаланаётганлардан бири Аҳмад Борбанд кўчасида яшовчи Гулрух Комиловадир. Матонати кучли бу аёл имконияти чекланган бўлишига қарамасдан, интилиш ва ҳаракатдан тўхтамайди. У ўзига шаҳар ҳокимининг маҳалладаги ёрдамчиси тавсияси асосида берилган 25 миллион сўм миқдоридаги имтиёзли кредит маблағи эвазига зарур ускуналарни олиб, ўз хонадонида пишириқчилик фаолилиятини йўлга қўйди. Ҳозирда бу ташаббус туфайли оила аъзолари билан биргаликда қўни-қўшнилардан 3 нафар ишсиз аёлнинг ҳам бандлиги таъминланмоқда.
Гулрух Комиловага шогирд тушган аёллар кунлик меҳнати учун 150 минг сўм иш ҳақига эга бўлиб, оиласига қўшимча даромад киритишмоқда. Буюртма асосида ўнга яқин хилдаги турли ширинлик ва пишиқлар тайёрланиб, тўй-маъракалар дастурхонига, савдо дўконларига етказиб берилмоқда. Халқимизда "Ҳунарли киши хор бўлмас" деган пурмаъно гапнинг далолати бу.
Вилоят ҳокимлиги матбуот хизмати