Бухоро вилояти ҳокимлиги

Бугун вилоят ҳокимлигида давлатимиз раҳбарининг мазкур қарори мазмун-моҳияти, вилоятда спортни оммалаштириш, селекция ва спорт таълимини ривожлантириш, соғлом турмуш тарзини тарғиб этиш, шаҳар ва туманлардаги спорт мактаблари фаолиятини тубдан яхшилаш масалаларига бағишланган йиғилиш бўлиб ўтди. Уни вилоят ҳокими Ботир Зарипов олиб борди.   

Биламизки, шаҳар-туманларда оммавий ва профессионал спортни ривожлантириш ҳамда спорт сиёсатини юритиш Спорт вазирлиги тизимидаги спорт мактаблари томонидан амалга оширилмоқда. Спорт мактабларининг фаолияти болалар, ўсмирлар ва ёшлар ўртасида жисмоний тарбия ва спортни оммалаштириш, спорт билан мунтазам шуғулланувчилар сонини босқичма-босқич ошириб боришга йўналтирилмоқда. Юқоридаги қарорга мувофиқ, эндиликда 2025-2026 ўқув йилидан бошлаб ҳудудларнинг ўзига хос хусусиятлари, аҳолининг қизиқишлари, шунингдек, эришилган спорт натижалари ҳамда мавжуд спорт инфратузилмасидан келиб чиқиб, спорт мактабларини спорт турларига ихтисослаштириш амалиёти жорий этилмоқда. Спорт мактабларида мавжуд штат бирликлари доирасида Спорт вазирлиги томонидан белгиланадиган миқдорда оммавий спорт бўйича тренер-селекционер лавозими жорий қилинмоқда.

Қарорга биноан ҳар бир оммавий спорт бўйича тренер-селекционерга 5 тагача маҳалла ва унинг ҳудудидаги давлат таълим муассасалари бириктирилмоқда. Оммавий спорт бўйича тренер-селекционер ўзига бириктирилган ҳудудда ёшлар етакчилари ҳамда жисмоний тарбия ўқитувчилари билан ҳамкорликда “Беш ташаббус олимпиадаси”, “Жисмоний тайёргарлик даражаси” спорт синовлари ва бошқа оммавий спорт тадбирларини ташкил этиш ва ўтказиб боришга масъул ҳисобланади.

Спорт мактабларининг оммавий спортни ривожлантириш ва селекция бўйича директор ўринбосарлари ҳамда оммавий спорт бўйича тренер-селекционерлар базавий тариф ставкасига устамалар “Беш ташаббус олимпиадаси”, “Жисмоний тайёргарлик даражаси” спорт синовларидаги натижалар ҳамда спорт мактабига селекция қилинган иқтидорли ёшлар сонидан келиб чиқиб белгиланмоқда. 

Бу борада вилоятимизга дахлдор баъзи маълумотларга тўхталсак, айни кунда вилоятда жами 3 536 та спорт иншооти ҳамда 31 та спорт таълим муассасаси фаолият юритаётган бўлиб, шундан олимпия ва паралимпия спорт турларига тайёрлаш маркази, 16 та спорт мактаби, 4 та ихтисослаштирилган спорт мактаби, минтақавий футбол академияси, болалар ва ўсмирлар футбол мактаби, чавандозлар мактаби, 7 та олимпия ва миллий спорт турлари бўйича давлат ихтисослаштирилган мактаб интернатини санаб ўтиш мумкин. 

Бугунги кунда, мавжуд спорт иншоотларида вилоятимизнинг 800 минг (40 фоиз) нафардан ортиқ аҳолиси спорт билан шуғулланиб келаётган бўлиб, спорт таълим муассасаларида 1 590 нафар тренер-мураббий (506 нафари қизлар) қўл остида 52 минг 244 нафар (18 минг 430 нафари қизлар) спортчи мунтазам шуғулланмоқда.  

Олимпия ва паралимпия ҳаракатини ривожлантириш мақсадида спортчиларимизга яратиб берилаётган шарт-шароит туфайли 2024 йилда Бухоро вилояти спортчилари томонидан Франциянинг Париж шаҳрида ўтказилган 33-Олимпиада ўйинларида 1 та (Абдумалик Халлаков) ҳамда 17-Паралимпиада ўйинларида ҳам 1 та (Шерзод Намозов) жами 2 та олтин медал қўлга киритилди. Бундан ташқари, ўтган йили Осиё, Жаҳон чемпионати, кубоклари ва ҳалқаро нуфузли турнирларда жами 626 та медаллар жамланмаси, 260 та олтин, 129 та кумуш, 237 та бронза медали жамғаришга эришилган. 

-Албатта, барча ғалаба-ютуқлар ўзимизники, бунинг учун меҳнат қилган, спортнинг қаттиқ нонини татиганларга чин дилдан миннатдорчилик билдирамиз ва бор имкониятимиз билан қуллаб-қувватлаймиз. Айтиш жоизки, бу соҳада бажаришимиз лозим бўлган ишлар ҳам, камчиликлар ҳам ҳали етарлича,-деди Ботир Зарипов.

Спортда натижадорликка эришишда рақобатни таъминлаш устувор вазифалардан биридир. Рақобатни ошириш учун эса албатта селекция ишлари муҳимлигига қарамасдан, бу борада барча таълим муассасаларда ишлар кўнгилдагидек эмас. Аҳоли ўртасида соғлом турмуш тарзини ҳаётга кенг татбиқ этиш ва оммавий спортни янада ривожлантириш борасида бирорта ҳудуд фаолияти қониқарли даража эмас. Юқоридагиландан келиб чиқиб, таъкидлаш лозимки, спортчиларни доимий узлуксиз ўқув-машғулот йиғинлари, халқаро мусобақа ва турнирларда мунтазам иштирокини таъминлаш, малакали тренерлар ва хорижий мутахассисларни жалб қилиш, биринчи навбатда Олимпия ва паралимпия спорт турлари бўйича натижакорликни ошириш зарур.

Танқидий ва таҳлилий муҳокама қилинган кун тартибидаги масала юзасидан вилоят ҳокимининг ўринбосари Бахтиёр Адилов, вилоят спорт бошқармаси бошлиғи Ўткир Нажмиддинов, Олот туманидаги олимпия заҳираларига тайёрлаш спорт мактаби директори Рустам Тўраев ахборотлари, таклиф-мулоҳазалари тингланди. 

Йиғилиш якунида вилоят ҳокими Ботир Зарипов томонидан спортга масъул мутасаддилар зиммасига соҳа фаолиятини тубдан яхшилашга доир қатор вазифалар юкланди. 

Вилоят ҳокимлиги матбуот хизмати