Бухоро шаҳри: “Отбозор”даги биргина иссиқхонада ўндан ортиқ ишчи даромадга эришмоқда
2026-10-31 08:50:00 / Янгиликлар
Айни кунда ҳудудда ишсизликни бартараф этиш, камбағалликни қисқартириш, кам даромадли оилаларга даромад манбаини яратишга эътибор қаратилмоқда. Ҳудудда ташаббускор тадбиркорлик ҳаракатини қўллаб-қувватлаш, бизнес лойиҳаларини рўёбга чиқариш орқали ўнлаб оилалар моддий манфаатдорлиги таъминланаётгани мақсадга мувофиқ. Буни биргина "Отбозор" маҳалласи мисолида ҳам кўришимиз мумкин.
Бугунга келиб 16 мингдан ортиқ аҳоли истиқомат қилаётган "Отбозор" маҳалла фуқаролар йиғинида фойдаланилаётган томорқа ери 150 гектарни ташкил этмоқда. Маҳалланинг асосий ривожланиш “драйвери” қишлоқ хўжалиги бўлиб, етакчи тармоғи боғдорчилик ва деҳқончилик ҳисобланади. Ҳудудда ўнлаб хонадон иссиқхонасига — даромад манбаига эга бўлиб, йил бўйи бунда сархил ҳосил етиштирилиб, бозорга чиқарилади. Ҳудудда етакчи тармоғи боғдорчилик ва деҳқончилик ҳисобланади. Ҳудудда ўнлаб хонадон иссиқхонасига — даромад манбаига эга ва йил бўйи бунда сархил ҳосил етиштирилиб, бозорга чиқарилади.
Маҳаллада самарали меҳнат ва ташаббускорлик намунасини кўрсатаётган томорқа эгаларидан бири Марзия Қурбоновадир. Меҳнаткаш хонадон бекаси маҳалла кўмагида тижорат банкидан олинган 45 миллион сўм миқдорида имтиёзли кредит маблағидан фойдаланиб, 30 сотих ер майдонида барпо қилган иссиқхона хўжалигида баракали ҳосил етиштирмоқда. Натижада 15 нафар хотин-қизнинг бандлигини таъминлашга, уларнинг кунлик 100-150 минг сўм атрофида даромад топишига муносиб ҳисса қўшмоқда.
Иссиқхонада мавсумга мос асосан помидор, бодринг, бақлажон, булғор ва аччиқ қалампири, саримсоқпиёз етиштираётган Марзия опа ва унинг жамоаси айни пайтда ҳалол меҳнат маҳсули ва моддий манфаатдорлигини кўришмоқда. Жорий йил биринчи ярмида сархил сабзавотдан 200 миллион сўмдан ошиқ моддий фойда кўрган миришкорлар ҳозирда ҳам иссиқхонани яшнатиб, мўл ҳосил етиштириш ҳаракатидалар.
Хулоса шуки, бу каби иссиқхона хўжаликлари хотин-қизлар тадбиркорлигини қўллаб-қувватлаш, имтиёзли кредит сармояси орқали янги иш ўринлари яратиш, оилалар даромадларини оширишда муҳим аҳамиятга эга.
Вилоят ҳокимлиги матбуот хизмати