Бухоро вилояти ҳокимлиги

Давра суҳбатида Бухоро вилоятининг хорижий шаҳарлар билан йўлга қўйган биродарлик алоқалари, ушбу ҳамкорликнинг бугунги ҳолати ва эришилган натижалар таҳлил қилиниб, мавжуд имкониятлардан самарали фойдаланиш орқали ҳамкорликни янги босқичга олиб чиқиш масалаларига алоҳида эътибор қаратилди.

Таъкидланганидек, бугунги кунда Бухоро шаҳри дунёнинг 22 та шаҳри, Ғиждувон тумани эса битта хорижий шаҳар билан биродарлик алоқаларини ўрнатган. Натижадa вилоят миқёсида жами 23 та хорижий шаҳар билан биродарлик муносабатлари йўлга қўйилган. Бу алоқалар ҳудудлар ўртасида тажриба алмашиш, маданий-гуманитар муносабатларни ривожлантириш, туризм соҳасидаги имкониятларни кенгайтириш ҳамда янги иқтисодий ҳамкорлик йўналишларини шакллантиришда муҳим аҳамият касб этмоқда.

Халқаро ҳамкорликнинг амалий натижалари сифатида Франциянинг Рюэй-Мальмезон шаҳрида буюк аллома Абу Али ибн Сино ҳайкалининг ўрнатилиши ва Ўзбекистон боғининг ташкил этилиши алоҳида қайд этилди. Шунингдек, бухоролик ҳунармандларнинг АҚШнинг Санта-Фе шаҳрида ҳар йили ўтказиладиган кўргазмаларда иштирок этиши маҳаллий амалий санъат ва ҳунармандчилик намуналарини халқаро миқёсда тарғиб қилиш, миллий қадриятларимизни кенг намойиш этиш ҳамда хорижий ҳамкорлар билан алоқаларни мустаҳкамлашга хизмат қилаётгани таъкидланди.

Бундан ташқари, Туркиянинг Измир ва Малатия шаҳарлари билан ҳамкорлик алоқаларининг ривожланиб бораётгани ҳудудлар ўртасидаги ўзаро манфаатли муносабатларнинг муҳим йўналишларидан бири сифатида эътироф этилди. Бундай ҳамкорлик алоқалари орқали туризм, маданият, ҳунармандчилик ва бошқа соҳаларда янги ташаббусларни илгари суриш, тажриба алмашиш ҳамда қўшма лойиҳаларни амалга ошириш учун кенг имкониятлар яратилади.

Учрашув давомида мавжуд биродарлик алоқаларини янада мустаҳкамлаш, ҳамкор шаҳарлар географиясини кенгайтириш ва истиқболли йўналишларда янги қўшма лойиҳаларни ишлаб чиқиш масалалари атрофлича муҳокама қилинди. Хусусан, хорижий шаҳарлар билан ҳамкорликни фақат маданий тадбирлар ва расмий учрашувлар доирасида эмас, балки аниқ амалий натижаларга йўналтирилган ташаббуслар асосида ривожлантириш муҳимлиги айтиб ўтилди.

Айниқса, туризм, маданият, ҳунармандчилик ва банк-молия соҳаларида ҳамкорликни кенгайтиришга алоҳида эътибор қаратилди. Бунда ўзаро тажриба алмашиш, туристик салоҳиятни ҳамкорликда тарғиб қилиш, маданий тадбирлар ва кўргазмалар ташкил этиш, миллий ҳунармандчилик маҳсулотларини хорижий бозорларда кенгроқ намойиш этиш, шунингдек, маҳаллий тадбиркорлар ва ҳунармандлар учун янги ҳамкорлик имкониятларини яратиш муҳим вазифалар сифатида белгиланди.

Шу билан бирга, биродар шаҳарлар ўртасидаги алоқаларни тизимли равишда ривожлантириш, мавжуд келишувларнинг ижросини таъминлаш, ўзаро ташрифлар ва тажриба алмашиш тадбирларини фаоллаштириш ҳамда ҳамкорликнинг янги истиқболли йўналишларини белгилаб олиш зарурлиги, бу эса ҳудуднинг иқтисодий, туристик ва маданий салоҳиятини халқаро майдонда кенг тарғиб этишга хизмат қилишқайд этилди.

Учрашув якунида билдирилган таклиф ва ташаббусларни амалий жиҳатдан қўллаб-қувватлаш, уларни босқичма-босқич ҳаётга татбиқ этиш, хорижий шаҳарлар билан ҳамкорлик кўламини кенгайтириш ҳамда янги қўшма лойиҳаларни амалга ошириш муҳимлиги таъкидланди.

Қайд этилганидек, халқ дипломатиясини изчил ривожлантириш, биродар шаҳарлар билан ўзаро ишонч ва манфаатдорликка асосланган муносабатларни мустаҳкамлаш Бухоро вилоятининг халқаро алоқаларини янада жадаллаштириш, ҳудуднинг бой тарихий-маданий мероси ва туристик салоҳиятини дунёга кенг танитиш ҳамда унинг халқаро нуфузини оширишда муҳим омил бўлиб хизмат қилади.