Бухоро вилояти ҳокимлиги

Қардош халқларнинг бой маданий мероси, миллий санъати ва мусиқий анъаналарини намоён этган мазкур тадбир Ўзбекистон ва Озарбайжон ўртасидаги дўстлик, биродарлик ва маданий ҳамкорликнинг ёрқин ифодаси бўлди.
 
Унда Бухоро вилояти ҳокими Ботир Зарипов, Озарбайжон Республикасининг Ўзбекистондаги Фавқулодда ва мухтор элчиси Рашад Маммадов, икки мамлакат вакиллари, санъат намояндалари, ижодкорлар, ёшлар ҳамда маданият ихлосмандлари иштирок этди.
 
Тадбир аввалида Бухоро вилояти ҳокими Ботир Зарипов сўзга чиқиб, меҳмонларни қадимий ва ҳамиша навқирон Бухоро заминида қутлашдан мамнунлигини билдирди. У ўз табрик сўзида ўзбек ва озарбайжон халқларини асрлар давомида шаклланган муштарак тарих, яқин тил, бой маънавий мерос, урф-одатлар ва эзгу қадриятлар бирлаштириб туришини алоҳида таъкидлади.
 
Қайд этилганидек, бугунги кунда Ўзбекистон ва Озарбайжон ўртасидаги муносабатлар ана шу мустаҳкам маънавий пойдевор асосида изчил ривожланиб, стратегик ҳамкорлик янги мазмун билан бойиб бормоқда. Ўзбекистон Республикаси Президенти Шавкат Мирзиёев ва Озарбайжон Республикаси Президенти Илҳом Алиев ўртасидаги самимий дўстлик, ўзаро ишонч ва қатъий сиёсий ирода икки мамлакат ҳамкорлигини янада юксалтиришда муҳим омил бўлиб хизмат қилмоқда.
 
Вилоят ҳокими Бухорода ўтказилаётган Озарбайжон маданияти кунларини халқлар ўртасидаги яқинликни мустаҳкамлаш, бир-бирининг миллий маданияти ва санъатини чуқурроқ англаш, шунингдек, ижодий ҳамкорлик учун янги имкониятлар яратишга хизмат қиладиган муҳим маданий воқеа сифатида эътироф этди.
 
Шундан сўнг Озарбайжон Республикасининг Ўзбекистондаги элчиси Рашад Маммадов ҳам сўзга чиқди. Элчи икки қардош халқ ўртасидаги тарихий алоқалар ва дўстона муносабатларнинг аҳамиятига тўхталиб, маданият ва санъат соҳасидаги бундай учрашувлар халқларни янада яқинлаштиришини таъкидлади. Шунингдек, Озарбайжон маданияти кунларининг қадимий Бухорода ташкил этилгани икки мамлакат ўртасидаги маданий-гуманитар алоқаларни ривожлантириш, миллий санъат анъаналарини кенг тарғиб этиш ва ўзаро тажриба алмашиш учун муҳим аҳамият касб этиши қайд этилди.
 
Дарҳақиқат, Бухоро азалдан турли халқлар маданияти ва цивилизациялари ўзаро уйғунлашган, дўстлик ва бағрикенглик қадриятлари юксак қадрланган маскан сифатида машҳур. Шу маънода, Озарбайжон маданияти кунларининг ушбу қадимий шаҳарда ўтказилиши алоҳида рамзий маънога эга. Зеро, халқларни бирлаштирувчи энг мустаҳкам кўприк — бу уларнинг муштарак тарихи, маънавий қадриятлари ва санъатга бўлган меҳридир.
 
Тадбирнинг бадиий қисмида ўзбек ва озарбайжон халқларининг дилбар қўшиқлари янграб, миллий мусиқа анъаналари намоён этилди. Озарбайжоннинг ўзига хос мусиқий мероси, жумладан, муғом санъати ва жўшқин куй-қўшиқлари, ўзбек санъатининг нафис оҳанглари билан уйғунликда иштирокчиларга кўтаринки кайфият бағишлади. Саҳнада янграган куй-қўшиқлар икки халқнинг маънавий яқинлиги, санъатга бўлган юксак эҳтироми ва умуминсоний қадриятларга содиқлигини яна бир бор намоён этди.
 
Концерт дастури нафақат санъат байрами, балки халқлар ўртасидаги дўстликни мустаҳкамлайдиган, ўзаро ҳурмат ва ишончни юксалтирадиган муҳим маданий мулоқот майдонига айланди. Бундай тадбирлар орқали ёш авлод икки қардош халқнинг тарихи, миллий анъаналари ва маданий бойликлари билан яқиндан танишиш, уларга нисбатан ҳурмат ва қизиқишни янада ошириш имконига эга бўлади.
 
Озарбайжон маданияти кунлари доирасида ташкил этилган мазкур концерт Ўзбекистон ва Озарбайжон ўртасидаги дўстлик алоқаларини мустаҳкамлаш, маданий-гуманитар ҳамкорликни кенгайтириш ва халқлар ўртасидаги самимий муносабатларни янада ривожлантириш йўлидаги муҳим қадам бўлди.
 
Қардош халқларнинг мусиқаси, санъати ва маънавий қадриятлари бир саҳнада жамланган ушбу оқшом Бухоро аҳли ва меҳмонларига унутилмас таассуротлар улашди.
 
Вилоят ҳокимлиги матбуот хизмати