Бухоро вилояти ҳокимлиги

Хусусан, “Ijro.gov.uz” ижро интизоми идоралараро ягона электрон тизими орқали Ўзбекистон Республикаси Президентининг Фармон, қарор ва фармойишлари, Президент топшириқлари ҳамда мажлис баёнларида белгиланган вазифалар ўз вақтида ижрога қаратилиб, уларнинг сифатли ва тўлиқ бажарилиши қатъий назоратга олинган.

Ҳафтанинг ҳар душанба куни Бухоро вилояти ҳокими раҳбарлигида, чоршанба ва жума кунлари эса вилоят ҳокимининг биринчи ўринбосари ҳузурида ижро интизомининг ҳолати танқидий-таҳлилий муҳокама қилиб борилмоқда. Ўзбекистон Республикаси Президенти, Президент Администрацияси ҳамда Вазирлар Маҳкамасининг ҳужжатлари ва топшириқлари ижроси кунбай ва соатбай назорат қилинмоқда.

“Ijro.gov.uz” тизимига киритилган қонунчилик ҳужжатлари ва топшириқлари Адлия вазирлиги, Вазирлар Маҳкамаси ҳамда Ҳисоб палатаси томонидан тегишли тартибда экспертизадан ўтказилгандан сўнг назоратдан ечилишини инобатга олиб, уларнинг белгиланган муддатларда ва пухта бажарилишини таъминлаш мақсадида вилоят ҳокимлиги аппаратида олдиндан огоҳлантириш тизими йўлга қўйилган.

Мазкур тизим доирасида ҳар ҳафта икки маротаба келгуси ойнинг якунига қадар ижро муддати етиб келадиган топшириқлар рўйхати эслатма тарзида ҳоким ўринбосарлари, маслаҳатчилари, бўлинма раҳбарлари ҳамда туман ва шаҳар ҳокимликларига етказиб борилмоқда.

Шунингдек, вилоят ҳокимлиги аппаратида қонунчилик ҳужжатлари ва топшириқлари ижроси ҳақидаги маълумотларни ижро муддати якунланишини кутмасдан, электрон тизимга олдиндан киритиб бориш масаласига алоҳида эътибор қаратилмоқда.

Қонунчилик ҳужжатлари ва топшириқлари ижросини жойларда ўрганиш, аниқланган камчиликларни бартараф этиш ҳамда масъулларга амалий ёрдам кўрсатиш мақсадида вилоят ҳокимлиги аппаратининг масъул ходимлари томонидан ҳар ойда камида битта туман ёки шаҳар ҳокимлигида ҳамда вилоят бошқарма, корхона ва ташкилотларида мақсадли ўрганишлар ўтказилмоқда.

Жумладан, 2026-йилнинг феврал ойида Жондор тумани ҳокимлигида, март ойида Бухоро автомобил йўллари ҳудудий бошқармасида, апрель ойида Қоракўл тумани ҳокимлигида, май ойида вилоят экология, атроф-муҳитни муҳофаза қилиш ва иқлим ўзгариши бошқармасида, июн ойида Пешку тумани ҳокимлигида, август ойида Шофиркон тумани ҳокимлигида ҳамда сентябрь ойида Санитария-эпидемиологик осойишталик ва жамоат саломатлиги хизмати вилоят бошқармасида қонунчилик ҳужжатлари ва топшириқлари ижроси ҳолати ўрганилиб, топшириқлар ижросини ташкил этиш юзасидан амалий ёрдам кўрсатилди.

2026-йилнинг январ–сентябрь ойлари давомида вилоят ҳокимлиги аппаратида ижро интизомининг ҳолати 67 маротаба муҳокама қилинди.

Вилоят ҳокимлиги бошқарув аппаратида ижро интизомини мустаҳкамлаш бўйича белгиланган вазифалардан келиб чиқиб, ҳар бир топшириққа “темир интизом” тамойили асосида жиддий ёндашилмоқда. Ўзбекистон Республикаси Президенти ва Ҳукумат топшириқларини ўз вақтида, самарали ҳамда тўлиқ бажаришда вилоят ҳокими ўринбосарлари, вилоят корхона ва ташкилотлари раҳбарлари, туман ва шаҳар ҳокимларининг роли ҳамда шахсий жавобгарлигини оширишга алоҳида эътибор қаратилмоқда.

Топшириқлар ижросида сусткашликка йўл қўйган масъул раҳбарларга нисбатан белгиланган тартибда интизомий таъсир чоралари кўриб борилмоқда.

“Ijro.gov.uz” ижро интизоми идоралараро ягона электрон тизими орқали 2026-йил январ–сентябрь ойлари давомида вилоятга дахлдор жами 3 636 та топшириқ келиб тушган.

Шундан, 2 217 таси — вилоят ҳокимлиги асосий ижрочи сифатида, 1 419 таси — вилоят ҳокимлиги ҳамижрочи сифатида белгиланган.

Мазкур топшириқларнинг 3 618 таси, яъни 99,5 фоизи ижроси таъминланиб, назоратдан ечилган.

Қолган 18 та топшириқда вилоят ҳокимлиги ҳамижрочи сифатида белгиланган бўлиб, айни вақтда уларнинг ижросини таъминлаш бўйича тегишли чоралар кўрилмоқда.

Шунингдек, “Ijro.gov.uz” ижро интизоми идоралараро ягона электрон тизимининг Президент Администрацияси модулида вилоят ҳокимлигига дахлдор 440 та, Вазирлар Маҳкамаси топшириқлари модулида эса 1 163 та топшириқ келиб тушган бўлиб, уларнинг барчаси бўйича ижро таъминланган.

2026-йил октабр ойида келиб тушган топшириқлар ижросини таъминлаш мақсадида кунбай календар график ишлаб чиқилди.

Шунингдек, ҳар бир ҳоким ўринбосари кесимида “Йўл харита”лари ишлаб чиқилиб, тасдиқланди ва ижрога қаратилди.

Октабр ойида Ўзбекистон Республикаси Президентининг 277 та топшириғи назоратга олинган бўлиб, шундан 74 тасининг ижроси муддатидан олдин таъминланди.

Қолган топшириқлар ижросини белгиланган муддатларда, сифатли ва тўлиқ таъминлаш юзасидан барча зарур чоралар кўрилмоқда.

Умуман, вилоятда Ўзбекистон Республикаси Президентининг, Президент Администрациясининг ҳамда Вазирлар Маҳкамасининг октабр ойида белгиланган топшириқлари ижросини ўз вақтида ва сифатли таъминлаш, ижро интизомини янада мустаҳкамлаш ҳамда масъул раҳбарларнинг шахсий жавобгарлигини ошириш бўйича тизимли ишлар давом эттирилмоқда.

Умид Қўшшаев,
Вилоят ҳокимлиги бошқарув аппарати ижро интизоми назорати бўлими бошлиғи