Бухоро вилояти ҳокимлиги

Бухоронинг ноёб тарихий обидалари жамланган Пойи Калон майдонида ўтказилган мазкур мусиқий кеча нафақат санъат ихлосмандлари, балки икки мамлакат ўртасидаги маданий-гуманитар ҳамкорликка қизиқувчи кенг жамоатчилик учун ҳам муҳим тадбир бўлди.

Тадбирда вилоят ҳокими Ботир Зарипов, Франциянинг Ўзбекистондаги Фавқулодда ва Мухтор Элчиси Уалид Фук, маданият ва санъат соҳаси вакиллари, хорижий меҳмонлар, ижодкорлар ҳамда Бухоро аҳли иштирок этди.

Тадбир аввалида вилоят ҳокими Ботир Зарипов сўзга чиқиб, йиғилганларни қутлади. Ўз нутқида у Пойи Калон майдонида янграйдиган ҳар бир куй нафақат санъат асари, балки турли даврлар ва маданиятларни боғловчи ўзига хос мулоқот воситаси эканини таъкидлади.

Франциянинг Ўзбекистондаги Фавқулодда ва Мухтор Элчиси Уалид Фук эса маданий алмашинувлар халқлар ўртасидаги ўзаро англашув ва дўстликни мустаҳкамлашда муҳим аҳамият касб этишини қайд этди.

Таъкидланганидек, Ўзбекистон ва Франция ўртасидаги муносабатларда маданий-гуманитар ҳамкорлик алоҳида ўрин тутади. Кейинги йилларда икки мамлакат ўртасида санъат, маданият, таълим ва бошқа соҳалардаги алоқалар изчил ривожланиб бормоқда. Франция маданияти кунлари доирасида Бухорода ўтказилаётган тадбирлар ҳам ана шу ҳамкорликнинг амалий ифодасидир.

Концерт дастуридан мумтоз мусиқанинг турли даврларини намоён этувчи композиторлар асарлари ўрин олди. Кристин Фонлуптнинг юқори ижро маҳорати ва ўзига хос талқини томошабинларга мумтоз фортепиано мусиқасининг бетакрор оламини ҳис этиш имконини берди.

Айниқса, концертнинг Пойи Калон ансамбли бағрида, Бухоронинг асрлар силсиласини ўзида мужассам этган тарихий муҳитида ўтказилгани тадбирга алоҳида мазмун бағишлади. Қадимий меъморлик ва мумтоз мусиқа уйғунлиги иштирокчилар учун ўзига хос эстетик муҳит яратди.

Мусиқа кечаси давомида санъатнинг тил, чегара ва масофани билмайдиган, инсон қалбига бевосита таъсир кўрсатувчи универсал восита экани яна бир бор намоён бўлди. Турли маданият ва анъаналарни бир маконда бирлаштирган мазкур тадбир халқлар ўртасидаги дўстлик ва ўзаро ҳурматни янада мустаҳкамлашга хизмат қилди.

Шу маънода, Бухорода ўтказилган фортепиано концерти Франция маданияти ойлигининг муҳим тадбирларидан бири сифатида тарихий шаҳарнинг бой маданий ҳаётига яна бир мазмунли саҳифа қўшди.

Тадбир якунида иштирокчиларга юксак бадиий савиядаги мусиқий дастур ва бетакрор тарихий муҳит уйғунлиги юқори таассурот қолдирди.

Вилоят ҳокимлиги матбуот хизмати