Газли шаҳрининг 70 йиллиги муносабати билан 12 нафар болажоннинг суннат тўйи ўтказилди
2026-09-27 13:05:00 / Янгиликлар
Тантанали маросимда болажонлар, уларнинг ота-оналари, яқинлари, маҳалла фаоллари ҳамда кенг жамоатчилик вакиллари иштирок этди. Қувонч ва шодликка бой кечган тадбир болажонлар ва уларнинг ота-оналари учун унутилмас хотираларга айланди.
Тантанали маросимда вилоят ҳокими Ботир Зарипов сўзга чиқиб, тўйболалар ва уларнинг ота-оналарини қутлуғ айём билан самимий муборакбод этди.
Вилоят раҳбари болажонларга мустаҳкам соғлик, бахтли ва мазмунли болалик, келгусида эзгу ниятлар билан камол топиб, эл-юртга наф келтирадиган инсонлар бўлиб вояга етишларини тилади. Ота-оналарга эса фарзандларининг камолини кўриб, уларнинг ютуқларидан доимо фахрланиб юришларини тилак билдирди.
Тўй муносабати билан 12 нафар болажонга миллий анъаналаримизга хос равишда сарполар кийдирилди. Шунингдек, уларга эсдалик совғалари ва велосипедлар топширилди. Болажонларнинг қувончи, самимий табассумлари ва тўйона совғалардан мамнунлиги тантанага янада файз бағишлади.
Тадбир давомида Газли шаҳрининг 70 йиллик тарихида унинг ободлиги ва равнақига ўз ҳиссасини қўшиб келаётган фаол фуқаролар ҳам эътироф этилди. Шаҳарни ободонлаштириш, кўркамлигини ошириш ва жамоат ишларида фаол иштирок этаётган бир гуруҳ газлиликларга ташаккурномалар ҳамда қимматбаҳо совғалар топширилди.
Бу эътироф Газлининг бугунги қиёфасини яратишга ўз меҳнати ва ташаббуси билан ҳисса қўшаётган инсонларга ҳурмат ва эҳтиромнинг ифодаси бўлди.
Тантанада Газлининг 70 йиллик тарихига хос қадриятлар — меҳр-оқибат, инсон қадри, маҳалла аҳлининг ҳамжиҳатлиги ва эзгу анъаналар яна бир бор намоён бўлди. Болажонларнинг қувончига катталарнинг самимий дуолари ва эзгу тилаклари ҳамроҳ бўлди.
Тадбир якунида санъаткорлар иштирокида концерт дастури намойиш этилди. Куй-қўшиқлар ва дилтортар чиқишлар байрамона кайфиятни янада кўтариб, Газлининг 70 йиллик юбилейи муносабати билан ўтказилаётган тантаналарга файз бағишлади.
Газлининг 70 йиллик юбилейи муносабати билан ўтказилаётган бу каби эзгу тадбирлар шаҳар тарихига ҳурмат, бугунги тараққиётга шукроналик ва келажак авлодга бўлган эътиборни ўзида мужассам этмоқда. Зеро, шаҳарнинг ҳақиқий байрами — унинг аҳли қувончи, фарзандлар кулгуси ва эзгу ниятлар билан янада файзли бўлган кунларидир.
Вилоят ҳокимлиги матбуот хизмати