Ғиждувон: 5 сотих ерда барпо этилган иссиқхона бир оиланинг барқарор даромад манбаига айланмоқда
2026-09-18 17:45:00 / Янгиликлар
Ғиждувонлик Умида Қўлдошева ҳам ана шундай ташаббускор тадбиркорлардан бири. У жорий йил февраль ойида тадбиркорлик фаолиятини йўлга қўйиш мақсадида “Ҳар бир оила -тадбиркор” дастури доирасида 26 миллион сўм миқдорида имтиёзли кредит олди.
Мазкур маблағ хонадонда янги имкониятларни рўёбга чиқариш учун йўналтирилди. Натижада 5 сотих майдонда иссиқхона ташкил этилди.
Аввалига оддий ташаббусдек кўринган ушбу иш бугун ўз самарасини бермоқда. Иссиқхонадан оқилона ва самарали фойдаланиш, экинларни парваришлашда агротехник талабларга амал қилиш натижасида йил давомида 3 маротаба ҳосил олиш имконияти яратилди.
Хонадондаги ҳар бир экин, ҳар бир кўчат ва ҳар бир ҳосил ортида оила аъзоларининг кундалик меҳнати, изланиши ва масъулияти мужассам.
Бугун ушбу меҳнат ўз самарасини бериб, оиланинг даромадини ошириш билан бирга, оила аъзоларининг бандлигини таъминлашга ҳам хизмат қилмоқда.
Айни пайтда 3 нафар оила аъзосининг бандлиги таъминланган. Энг қувонарлиси, оила 9 ой давомида иссиқхона фаолиятидан 40–45 миллион сўм миқдорида даромад олишга эришган.
Бу рақамлар ортида эса бир оиланинг ҳаракати, меҳнати ва ўз имкониятларига бўлган ишончи бор.
Хонадонда тадбиркорликнинг бир йўналиши билан чекланиб қолинмаяпти.
Иссиқхоначилик билан бир қаторда бу ерда анорчилик, чорвачилик ва паррандачилик йўналишларида ҳам иш олиб борилмоқда. Яъни хонадонда мавжуд ер ва меҳнат ресурсларидан комплекс фойдаланиш орқали бир нечта даромад манбаи шакллантирилган.
Бу эса оилавий тадбиркорликнинг муҳим жиҳатларидан бири — даромад манбаларини кенгайтириш ва мавжуд имкониятлардан унумли фойдаланиш имконини бермоқда.
Оила аъзоларининг биргаликда меҳнат қилиши эса яна бир муҳим натижани юзага келтирмоқда. Хонадонда нафақат даромад, балки меҳнат маданияти, тадбиркорлик кўникмалари ва келажакка ишонч ҳам шаклланмоқда.
Ишчи гуруҳ билан мулоқот давомида Умида Қўлдошева фаолиятини янада кенгайтириш нияти борлигини билдирди. Хусусан, қўйлар сонини кўпайтириш ва чорвачилик йўналишини ривожлантириш режалари мавжуд.
Бу каби ташаббуслар қўллаб-қувватланиши натижасида хонадонларда янги даромад манбалари яратилмоқда, оила аъзоларининг бандлиги таъминланмоқда ва кичик тадбиркорлик учун янги имкониятлар очилмоқда.
Энг муҳими, бугунги натижа эртанги янада катта режалар учун пойдевор бўлмоқда.
Ташаббус бор жойда имконият, меҳнат бор жойда барака, ҳаракат бор жойда натижа бўлади.
Вилоят ҳокимлиги матбуот хизмати