Бухоро вилояти ҳокимлиги

Қишлоқ хўжалигини саноатлаштириш бўйича асосий етакчи корхона ва маҳаллий пахта саноатидаги йирик субъектлардан бири сифатида “XINJIANG LIHUA GROUP” LTD    2021 йилда қишлоқ хўжалигини саноатлаштириш бўйича 100 та етакчи корхона ичида 75-ўринни эгаллаган. Ўша йилларда мазкур компания Хитойнинг энг яхши 500 та қишлоқ хўжалиги корхоналари орасида кучли юзталикка кирган.  

Бу компания 2004 йилда 110,5 миллион юанга тенг устав капитали асосида ташкил этилган. Сўнгги йилларда халқаро миқёсидаги ишончли ҳамкорлиги, йирик молия институтларининг қўллаб-қувватлаши туфайли “XINJIANG LIHUA GROUP” LTD      жадал ривожланди, бизнес ва саноат “занжири”ни доимий кенгайтирди.  

Аҳамиятли жиҳати, “XINJIANG LIHUA GROUP” LTD ҳозирда Хитойда 30 та шўба корхонасига эга бўлиб, олтита тармоқни, яъни уруғлик чигит тайёрлаш, сара навли пахта экиш, сотиб олиш ва қайта ишлаш, тўқимачилик ва тикувчилик, қўшимча маҳсулотларни қайта ишлаш ва савдони бирлаштирган тўлиқ саноат “занжири”—бизнес моделини ташкил этади. 

Пахта экиб етиштириш ва чуқур қайта ишлаш бўйича ўз юртида етакчи ўринлардан бирида бўлган “XINJIANG LIHUA GROUP” LTD  таркибида уруғчилик, пахта экиш базаларига, 82 та пахтани қайта ишлаш заводига, юзга яқин пахта тўқимачилик саноат паркига ва яна қўшимча тармоқларига эга бўлиб, бунда доимий иш билан банд бўлган ишчи-мутахассис сони 30 мингдан ортиқни ташкил этади. 

Кейинги йилларда вилоятимизнинг Шофиркон туманида сараланган навларда пахта экиб, мўл ҳосил етиштириш, йигирув ва тўқимачилик тармоқларини ривожлантириб, пахта толасини қайта ишлаш каби йирик лойиҳаларга қўл урилмоқда. Бу борада эса юқорида таъкидланган Хитойнинг айнан “XINJIANG LIHUA GROUP” LTD  яқин бизнес ҳамкор сифатида танланган. Зеро, чекка туманда хорижий инвестицияларни жалб этилиши орқали иқтисодий ўсишни жадаллаштириш, аҳоли бандлигини таъминлаш ҳар қачонгидан долзарб аҳамиятга эга.   

Шу нуқтаи назардан, туман ҳокими Алишер Файзуллаев Хитой Халқ Республикасидан ташриф буюрган инвесторлар иштирокида қатор лойиҳаларни муҳокама қилди. “XINJIANG LIHUA GROUP” LTD мутасаддилари билан бўлган музокарада ҳудуднинг Жилвон чўли массивида 20 минг гектар ер майдонини ўзлаштириш ва унда сара уруғлик чигит экиб, пахта етиштириш юзасидан ўзаро келишувга эришилди. Мазкур битимга мувофиқ, хитойлик ҳамкорлар биринчи босқичда 6 минг, иккинчи босқичда 8 минг, учинчи босқичда яна 6 минг гектар ер майдонини обод қилиб, ҳосил етиштириш, чўл шароитида томчилатиб суғориш технологиясини жорий қилишни мақсад қилишган. Қолаверса, ҳудудда етиштириладиган пахта ҳосилини қайта ишлаш ҳисобидан йилига 10 минг тонна пахта толасини ишлаб чиқариш имконияти яратилади.  

Айтиш жоизки, мазкур лойиҳанинг умумий қиймати 150 миллион АҚШ долларига баҳоланаётган бўлиб, бу хитойлик инвесторларнинг тўғридан-тўғри сармояси ҳисобланади. Шундан 5 миллион АҚШ доллари атрофидаги маблағ янгидан очиб ўзлаштириладиган ерларда томчилатиб суғориш технологияларини жорий этишга йўналтирилади. Кейинчалик бу ерлардан пахта етиштириш учун чуқур қайта ишлашни ўз ичига олган технологик корхоналар ташкил этиш мақсадида фойдаланилади. Мазкур йўналишда 5 та катта ва 10 та кичик комбайн агрегати, шунингдек, 75 та турли хил ва русумдаги трактор ва техника воситалари олиб келиниши кўзда тутилган. 

Муҳими, 2026 йил иккинчи ярмида рўёбга чиқарилиши мақсад қилинаётган хитойликлар билан ҳамкорликдаги бизнес лойиҳа туфайли чекка туманда 1 минг 750 та янги иш ўрни яратилади. Бу эса нафақат иқтисодий ўсишга, балки аҳоли бандлиги, турмуш даражасини оширишга хизмат қилади. 

Вилоят ҳокимлиги матбуот хизмати