Бухоро вилояти ҳокимлиги

Чуруқнинг ўзига хос тарихига назар ташласак, мавжуд манбаларга кўра, Бухоро амирлиги даврида, хусусан, Амир Олимхон ҳукмронлиги йилларида бу ҳудуд муҳим стратегик ва савдо йўлларидан бирида жойлашган.

Ҳозирги Зарафшон ва Томди ҳудудлари, шунингдек, Қозоғистон томонидан Бухоро амирлиги сари йўл олган савдо карвонлари Чуруқ ҳудуди орқали ҳаракатланган. Карвонлар Қозоғистон ҳудудидан “Қозоқ-асув” деб аталувчи тоғлар орасидаги йирик довон орқали Бухоро томон йўл олган. Ана шу йўналиш Чуруқ ҳудудининг иқтисодий ва стратегик аҳамиятини янада оширган. Узоқ масофаларни босиб ўтган савдогарлар, чорвадорлар ва карвон аҳли учун бу маскан муҳим бекатлардан бири вазифасини бажарган.

Юбилей муносабати билан юртимизнинг турли ҳудудларидан, шунингдек, қўшни Қозоғистон Республикасидан ҳам меҳмонлар ташриф буюрди. Ота-боболари, қариндош-уруғлари ва яқинлари билан дийдорлашиш мақсадида қарийб 300 нафар қардош Чуруқ овулида жам бўлди. Уларнинг ташрифи байрамга ўзгача файз-тароват ва кўтаринки кайфият бағишлади.

Тантаналарнинг дастлабки кунида овулда меҳмонлар учун кенг дастурхон ёзилиб, миллий таомлар, хусусан, бешбармоқ тортилди. Дастурхон атрофида жам бўлган юртдошлар ва меҳмонлар ўзаро дийдорлашиб, самимий суҳбатлар қурдилар.

Даврада Қуръони карим тиловат қилиниб, ўтган аждодлар руҳи ёдга олинди. Юртимиз тинчлиги ва осойишталиги, бугунги фаровон ҳаёт учун шукроналар билдирилиб, дуога қўл очилди. Бу эзгу амаллар Чуруқ овулининг бир асрлик тарихини яратган авлодлар хотирасига ҳурмат ва эҳтиромнинг ёрқин ифодаси бўлди.

Шундан сўнг овулдаги умумтаълим мактаби ўқувчилари томонидан тайёрланган бадиий чиқишлар, миллий куй-қўшиқлар ва турли саҳна кўринишлари намойиш этилди. Навқирон авлод вакилларининг чиқишлари тадбир иштирокчиларига кўтаринки кайфият ва байрам шукуҳини улашди.

Тантанали тадбирда туман ҳокимлиги, жамоатчилик вакиллари, чўлқуварлар юртида яшаётган аҳоли ва меҳмонлар иштирок этди. Чуруқликлар ва ташриф буюрган қардошлар мамлакатимиз мустақиллигининг 35 йиллиги ҳамда овулнинг 100 йиллик тарихий санасини катта шодиёна билан нишонладилар.

Йиғилганлар овул аҳлига тинчлик-хотиржамлик, оилавий фаровонлик, саломатлик ва келгуси тараққиёт йўлида улкан муваффақиятлар тиладилар.

Юбилей тантаналарининг иккинчи куни ҳам кўтаринки руҳда давом этди. Овулга ташриф буюрган меҳмонлар учун анъанага кўра, бешбармоқ ва ош тортилди. Бир дастурхон атрофида жам бўлган юртдошлар яна бир бор дийдорлашиб, самимий суҳбатлар қурдилар.

Чўлқуварлар қирида миллий ўйинларимиздан бири — кўпкари ташкил этилди. Унда узоқ ва яқин ҳудудлардан ташриф буюрган чавандозлар иштирок этиб, ўз маҳоратларини намойиш этдилар. Қизғин ва муросасиз кечган улоқ-кўпкари баҳслари томошабинларга ўзгача завқ ва ҳаяжон бағишлади.

Давлатимиз мустақиллигининг қутлуғ 35 йиллиги, ҳуррият байрамига уйғун тарзда ўтказилган Чуруқ овулининг 100 йиллик юбилей тантаналари халқимизга хос меҳмондўстлик, ҳамжиҳатлик, ўзаро меҳр-оқибат, миллий қадрият ва анъаналаримизнинг ёрқин намойишига айланди.

Бир асрлик тарихга эга Чуруқ овулининг юбилей тантаналари нафақат ўтмишни ёд этиш, балки бугунги тинч ва фаровон ҳаётни қадрлаш, авлодлар ўртасидаги ришталарни мустаҳкамлаш ҳамда келажакка ишонч билан қадам қўйишга чорловчи эзгу анъана сифатида тарих зарварақларидан муносиб ўрин олди.

Вилоят ҳокимлиги матбуот хизмати