Бухоро вилояти ҳокимлиги

Тадбирда туман ҳокимлиги мутасаддилари, маҳалла нуронийлари, фахрий устозлар, мактаб жамоаси, ўқувчилар ва ота-оналар иштирок этди.

Маросимда мактабнинг бир асрлик тарихи, бугунги ютуқлари ва келгусидаги режалари ҳақида сўз юритилди.

Мактабнинг тарихи 1921-йилга бориб тақалади. Мавжуд маълумотларга кўра, ўша даврда мактаб атиги икки синфдан иборат бўлиб, Облоберди бойнинг меҳмонхонасида ташкил этилган. Бу ерда 8 ёшдан 15 ёшгача бўлган болалар таълим олган.

Мактабнинг дастлабки ўқитувчилари Обид Ҳомидов ва Турди Қутлиевлар имкониятлар чекланган мураккаб даврда ҳам ёш авлодга сабоқ беришдек шарафли вазифани сидқидилдан адо этганлар.

Даргоҳ тарихида турли синовли кунлар ҳам бўлган. Ҳатто синф хонасига ўт қўйилиши оқибатида мактаб фаолияти вақтинча тўхтаган. Аммо халқнинг илм ва маърифатга бўлган интилишини тўхтатиб бўлмади. 1924-йилда таълим жараёни қайта тикланди.

Шундан сўнг “Тезгузар” мактаби тумандаги илк таълим масканларидан бири сифатида ўз фаолиятини давом эттириб, йиллар давомида “Тезгузар” ва атроф ҳудудлардаги фарзандларга билим ва тарбия бериб келди.

Мактаб мустақиллик йилларида Саъдулла Назаров номи билан аталди. Бугун эса у Шофиркон туманидаги 6-сон умумтаълим мактаби сифатида ўзининг шарафли йўлини давом эттирмоқда. Бир неча авлодга таълим ва тарбия берган, умрини шу даргоҳ равнақига бағишлаган фахрий устозлар бугунги тадбирнинг энг ҳурматли меҳмонлари бўлди.

Йиллар давомида мактабда фаолият юритиб, минглаб ўқувчиларга сабоқ берган, бугун эса меҳнат фаолиятини якунлаб, пенсия гаштини сураётган устозларнинг тадбирда иштирок этиши алоҳида рамзий маъно касб этди.

Зеро, бугунги замонавий мактабнинг пойдевори айнан ана шу фидойи устозларнинг машаққатли меҳнати, билими ва тажрибаси билан яратилган.

Тадбир давомида фахрий устозларга чуқур ҳурмат ва миннатдорлик билдирилиб, уларнинг мактаб тарихидаги муносиб ўрни алоҳида таъкидланди.

Кеча бу даргоҳда сабоқ берган устозлар бугун ўз шогирдлари ва мактабнинг янги авлоди билан бирга замонавий таълим масканининг фойдаланишга топширилишига гувоҳ бўлдилар.

Бир аср давомида “Тезгузар” мактабидан кўплаб етук инсонлар, олимлар, фан докторлари ва фан номзодлари, олтин медал соҳиблари, давлат ва жамоат арбоблари етишиб чиқди.

Улар орасида таниқли олим, академик Иброҳим Мўминовнинг номи алоҳида ўрин тутади. Унинг илмий мероси нафақат “Тезгузар” мактаби, балки бутун Бухоро замини учун фахрли меросдир.

Шунингдек, мактабни олтин медаль билан тамомлаб, кейинчалик давлат бошқаруви тизимида самарали меҳнат қилган, Ўзбекистон Республикаси Олий Мажлиси Сенати Раиси ўринбосари лавозимида фаолият юритган Мавжуда Ражабова ҳам мактабнинг муносиб шогирдларидан бири сифатида эътироф этилади.

Бу каби мисоллар қишлоқ мактабида таълим олган ёшлар ҳам юксак марраларни забт этиши мумкинлигини яққол намоён этади.

Бугунги кунда мактабда 69 нафар педагог фаолият юритмоқда. Уларнинг 14 нафари олий, 19 нафари биринчи ва 20 нафари иккинчи малака тоифасига эга.

Ўқувчиларнинг фан олимпиадалари, ижодий фестиваллар, турли танловлар ва халқаро дастурларда муносиб натижаларга эришаётгани мактаб жамоасининг изланишлари самарасидир.

Жумладан, 10-синф ўқувчилари томонидан 18 та миллий ва халқаро сертификат қўлга киритилган.

2026 йил якунига кўра, битирувчиларнинг 50 фоизи олий таълим муассасаларига қабул қилингани, уларнинг ўқишга киришдаги ўртача натижаси 120 баллни ташкил этгани ҳам мактаб жамоасининг самарали меҳнатидан далолат беради.

Тадбирнинг энг қувончли воқеаси, шубҳасиз, мактабнинг янги биноси фойдаланишга топширилганидир.

Осиё тараққиёт банки маблағлари ҳисобидан «Қишлоқ ҳудудларини барқарор ривожлантириш» дастури доирасида таълим масканида кенг кўламли таъмирлаш ва бунёдкорлик ишлари амалга оширилди.

Лойиҳа доирасида 8,2 миллиард сўм маблағ йўналтирилиб, 180 ўринли янги ўқув биноси барпо этилди. Натижада мактабнинг умумий ўқувчи сиғими 680 нафарга етказилди.

Янги синф хоналари замонавий жиҳозлар, янги парта ва стуллар, электрон доскалар ҳамда зарур техник воситалар билан таъминланди.

Энг муҳими, яратилган янги шароитлар мактабда бир сменали таълимни ташкил этиш имконини бермоқда.

Бу ўзгаришлар бир асрлик тарихга эга таълим маскани учун шунчаки янги бино эмас, балки янги тараққиёт босқичининг бошланганидан далолатдир.

Тадбирда сўзга чиққанлар мактабнинг бир асрлик тарихига алоҳида тўхталиб, унинг кечаги ва бугунги қиёфасини қиёсладилар. Айниқса, йиллар давомида шу мактабда меҳнат қилган фахрий устозларнинг бугунги шодликка шерик бўлаётгани тадбирга алоҳида файз бағишлади.

100 йил аввал икки синф билан бошланган таълим маскани бугун замонавий бино, янги имкониятлар ва юксак мақсадлар билан ўз тарихининг янги саҳифасини очмоқда.

“Тезгузар” мактабининг 100 йиллик юбилейи нафақат ўтган даврни сарҳисоб қилиш, балки келажакка катта ишонч билан қадам қўйиш айёми бўлди.

Янги шароитлардан самарали фойдаланган ҳолда, келгусида бу даргоҳдан яна кўплаб олимлар, етук мутахассислар, давлат ва жамоат арбоблари, Ватанга садоқатли ва билимли ёшлар етишиб чиқишига ишонч билдирилди.

“Тезгузар” мактабининг бир асрлик шарафли тарихи давом этади. Энди бу тарих янги бино, янги имкониятлар ва янги ютуқлар билан бойиб боради.

Вилоят ҳокимлиги матбуот хизмати