Бухоро вилояти ҳокимлиги

Жумладан, 2026 йил ҳосили учун фермер ва қишлоқ хўжалиги корхоналарининг 10 753 гектар асосий майдонларига картошка экилди.

Бухоро вилояти статистика бошқармаси маълумотларига кўра, 2026 йилнинг январь–июнь ойларида вилоятда 243,6 минг тонна картошка етиштирилиб, ҳар гектаридан ўртача 226,5 центнердан ҳосил олинди. Бу вилоят ички бозорини картошка маҳсулотлари билан таъминлашда маҳаллий ишлаб чиқаришнинг асосий манба эканлигини кўрсатади.

Етиштириш ҳажмининг юқорилиги натижасида картошкага бўлган эҳтиёжни импорт ҳисобига қоплаш зарурати ҳам камаймоқда. Хусусан, 2025 йилнинг январь–июнь ойларида Бухоро вилоятига 424 тонна, қиймати 52 минг АҚШ доллари бўлган картошка импорт қилинган бўлса, 2026 йилнинг биринчи ярим йиллигида Эрон ва Покистон давлатларидан жами 293 тонна, қиймати 32,5 минг АҚШ доллари бўлган картошка импорт қилинди.

Шундай қилиб, жорий йилнинг январь–июнь ойларида картошка импорти ҳажми ўтган йилнинг мос даврига нисбатан 131 тоннага ёки 31 фоизга камайди. Бу, ўз навбатида, вилоятда картошка етиштириш ҳажмининг ички бозор талабини таъминлашдаги аҳамияти ортиб бораётганини кўрсатади.

Шу билан бирга, мавсумий талабни барқарор таъминлаш ва куз-қиш ойларида нархларнинг кескин ўзгаришининг олдини олиш мақсадида етиштирилган маҳсулотларнинг бир қисми захирага жамғарилмоқда. Хусусан, вилоятда етиштирилган картошка ҳосилидан 24,0 минг тоннаси 45 та совуткичли омборхонага жойлаштирилиб, захирага жамғарилди.

Мазкур захира 2026 йил куз-қиш мавсумида марказий деҳқон бозорларини картошка маҳсулотлари билан узлуксиз таъминлаш, аҳоли эҳтиёжини барқарор қондириш ва ички бозорда нарх-наво барқарорлигини сақлашга хизмат қилади.

Умуман, вилоятда картошка етиштириш ҳажмининг юқорилиги, импорт ҳажмининг қисқариши ҳамда мавсумий захираларнинг шакллантирилиши аҳолини картошка маҳсулотлари билан барқарор таъминлаш учун етарли шарт-шароит яратилганидан далолат беради.