Когон тумани: 10-мактабнинг 240 ўринли биноси таъмирланиб, 330 ўринли қўшимча янги бино барпо этилмоқда
2026-08-22 11:00:00 / Янгиликлар
Жумладан, давлатимиз раҳбарининг 2021 йил 18-центабрдаги “Ислом тараққиёт банки ва ОПEК халқаро тараққиёт жамғармаси иштирокида «Қишлоқ жойларни барқарор ривожлантириш» лойиҳасини амалга ошириш чора-тадбирлари тўғрисида”ги қарори асосида «Когон» маҳалла фуқаролар йиғинидаги 10-сонли умумтаълим мактабида ҳам кенг кўламли бунёдкорлик ишлари амалга оширилмоқда.
Лойиҳа доирасида мактабнинг 240 ўринли мавжуд биноси капитал таъмирланиши билан бир қаторда, ўқувчилар қамрови ва таълим муассасасининг эҳтиёжларидан келиб чиқиб, 330 ўринли янги ўқув биноси барпо этилмоқда.
Шунингдек, ўқувчиларнинг жисмоний ва маънавий ривожланиши учун зарур шарт-шароитларни яратиш мақсадида 12х24 метр ўлчамдаги замонавий спорт зали ҳамда 12х12 метр ҳажмдаги фаоллар зали бунёд этилмоқда.
Лойиҳанинг умумий қиймати 10 миллиард сўмни ташкил этади. Қурилиш ишларини «Зиё Шаҳриёр қурилиш» МЧЖ амалга оширмоқда. Жараён давомида қурилиш ишларининг сифатли бажарилиши, белгиланган муддатларга риоя этилиши ҳамда замонавий қурилиш меъёрлари ва талабларига амал қилинишига алоҳида эътибор қаратилмоқда.
Бунёдкорлик ишлари якунлангач, мактабнинг моддий-техник базаси сезиларли даражада яхшиланиб, ўқувчилар учун замонавий таълим олиш, спорт билан шуғулланиш ва бўш вақтини мазмунли ташкил этиш имкониятлари кенгаяди.
Энг муҳими, бундай лойиҳалар ёш авлодга сифатли таълим ва муносиб тарбия бериш, уларнинг интеллектуал ҳамда жисмоний салоҳиятини ривожлантириш учун зарур шарт-шароитларни яратишга хизмат қилади.
Юртимиз мустақиллигининг 35 йиллиги арафасида амалга оширилаётган ушбу бунёдкорлик ишлари «Когон» маҳалласи аҳолиси, айниқса, ёшлар учун муносиб туҳфа бўлмоқда.
Вилоят ҳокимлиги матбуот хизмати