Бухоро вилояти ҳокимлиги

Айни пайтда туманда чорвачилик йўналишида фаолият юритаётган хўжаликларда наслли қорамоллар бош сонини кўпайтириш, уларни замонавий усуллар асосида парваришлаш ва маҳсулдорлигини ошириш борасида амалий ишлар олиб борилмоқда.

Хусусан, “Очил Бегиён” фермер хўжалигида 90 бош гўшт йўналишидаги наслли қорамол парваришланмоқда. Хўжаликда симментал, ангус, оқбош ва шароле зотли қорамоллар боқилмоқда. Мазкур зотларнинг гўштдорлик хусусиятларидан самарали фойдаланиш, уларни сифатли озуқа билан таъминлаш ва наслчилик ишларини тизимли йўлга қўйиш орқали чорва молларининг маҳсулдорлигини янада ошириш кўзда тутилган.

Шунингдек, “Анварота Замини” фермер хўжалигида 300 бош наслли, гўшт йўналишидаги қорамол парваришланмоқда. Бу ерда асосан қизилчўл, симментал, қозоқ оқбоши ва ангус зотли қорамоллар боқилмоқда. Хўжаликда наслли қорамоллар сонини кўпайтириш, уларнинг маҳсулдорлик кўрсаткичларини яхшилаш ва гўшт етиштириш ҳажмини босқичма-босқич оширишга қаратилган чора-тадбирлар амалга оширилмоқда.

Чорвачиликда юқори маҳсулдор зотларни кўпайтириш билан бир қаторда, чорва молларини тўғри озиқлантириш, сифатли ем-хашак базасини шакллантириш, ветеринария хизматларини ўз вақтида ташкил этиш ва парвариш жараёнларини самарали йўлга қўйиш ҳам муҳим аҳамият касб этади. Бу омиллар чорва молларининг саломатлиги ва маҳсулдорлигини таъминлаш баробарида, ишлаб чиқариш самарадорлигини оширишга ҳам хизмат қилади.

Таъкидлаш жоизки, чорвачилик тармоғининг барқарор ривожланиши ҳудуд иқтисодиёти учун ҳам муҳим аҳамиятга эга. Тармоқда ишлаб чиқариш ҳажмининг ортиши янги иш ўринларини яратиш, аҳоли даромадларини ошириш, қишлоқ хўжалиги маҳсулотларини қайта ишлаш имкониятларини кенгайтириш ва ички бозорда гўшт маҳсулотлари таъминотини яхшилашга хизмат қилади.

Шу нуқтаи назардан, Ғиждувон туманида чорвачилик хўжаликларининг моддий-техник базасини мустаҳкамлаш, наслчилик ишларини ривожлантириш, юқори маҳсулдор қорамоллар бош сонини кўпайтириш ҳамда замонавий парвариш усулларини жорий этиш борасидаги ишлар изчил давом эттирилади.

Бунда асосий мақсад — чорвачилик хўжаликларида мавжуд имконият ва салоҳиятдан тўлиқ фойдаланиш, сифатли гўшт маҳсулотлари ишлаб чиқариш ҳажмини ошириш ва ички бозор эҳтиёжини барқарор таъминлашдан иборат.

Зеро, дастурхонларимиз тўкинлиги, бозорларимизда сифатли ва хавфсиз озиқ-овқат маҳсулотларининг етарли бўлиши, аввало, қишлоқ хўжалигининг барқарор ривожига боғлиқ. Чорвачилик тармоғида яратилаётган имкониятлардан самарали фойдаланиш, наслчиликни ривожлантириш ва маҳсулдорликни ошириш эса аҳоли фаровонлиги ҳамда озиқ-овқат хавфсизлигини таъминлашнинг муҳим омилларидан биридир.

Вилоят ҳокимлиги матбуот хизмати