Бухоро вилояти ҳокимлиги

Маҳаллани комплекс ривожлантириш доирасида, аввало, ҳудуднинг муҳандислик-коммуникация инфратузилмасини яхшилашга алоҳида эътибор қаратилмоқда. Хусусан, 500 миллион сўм маблағ эвазига ёпиқ дренаж тизимини яхшилаш ишлари амалга оширилмоқда. Шунингдек, 2,3 миллиард сўм маблағ ҳисобидан маҳалла ички йўлларини шағаллаштириш ва асфалтлаштириш ишлари олиб борилмоқда.

Мазкур лойиҳалар натижасида ички кўчаларнинг ҳолати яхшиланиб, аҳолининг кундалик қатнови учун янада қулай ва хавфсиз шароит яратилади. Дренаж тизимининг яхшиланиши эса ҳудудда сув тўпланишининг олдини олиш, йўл ва бошқа инфратузилма обектларининг узоқ муддат хизмат қилишига хизмат қилади.

Ҳудуддаги муҳим масалалардан яна бири — электр таъминотининг барқарорлигини таъминлаш. Шу мақсадда 200 миллион сўм маблағ ҳисобидан ташқи электр таъминоти тизимини яхшилаш ишлари амалга оширилиши режалаштирилган. Ушбу чора-тадбирлар маҳалладаги истеъмолчиларни электр энергияси билан янада барқарор таъминлаш, мавжуд тармоқлар имкониятларини кенгайтириш ва электр таъминотидаги муаммоларни босқичма-босқич бартараф этишга қаратилган.

Дарғали маҳалласида аҳоли даромадларини ошириш, ер ва сув ресурсларидан унумли фойдаланиш ҳамда қишлоқ хўжалиги ишлаб чиқариш самарадорлигини юксалтириш масалаларига ҳам алоҳида эътибор қаратилмоқда.

Хусусан, “Бир контур — бир маҳсулот” тамойили асосида қишлоқ хўжалиги экинларини етиштириш йўналиши ривожлантирилмоқда. Шу мақсадда 4,5 километр узунликдаги Орғун каналини бетонлаштириш учун 3 миллиард 150 миллион сўм маблағ йўналтирилади.

Каналнинг бетонлаштирилиши, аввало, суғориш жараёнида сув йўқотилишининг камайиши, мавжуд сув ресурсларидан самарали фойдаланиш ва экин майдонларини барқарор суғориш имкониятларини кенгайтиради. Бу эса қишлоқ хўжалиги маҳсулотлари етиштириш ҳажми ва самарадорлигини ошириш, хўжаликлар фаолиятини ривожлантириш ҳамда маҳаллада янги даромад манбаларини шакллантириш учун муҳим омил бўлади.

Маҳалланинг ташқи қиёфасини янада обод қилиш, замонавий инфратузилмани шакллантириш ва аҳолига хизмат кўрсатиш имкониятларини кенгайтириш борасида ҳам қатор лойиҳалар амалга оширилмоқда.

Жумладан, Дарғали кўчасининг 1,5 километр қисмида савдо ва хизмат кўрсатиш обектларини ташкил этиш лойиҳаси амалга оширилмоқда. Ушбу йўналиш учун 710 миллион сўм маблағ ажратилиб, ҳудудда замонавий савдо ва хизмат кўрсатиш масканлари, пиёдалар йўлаклари, қуёш панеллари асосида ишлайдиган кўча чироқлари ҳамда замонавий архитектуравий элементлар барпо этилиши режалаштирилган.

Бу каби ободонлаштириш ва инфратузилма лойиҳалари нафақат кўчанинг ташқи қиёфасини яхшилайди, балки тадбиркорлик фаолияти учун янги имкониятлар яратади. Савдо ва хизмат кўрсатиш обектларининг кўпайиши натижасида янги иш ўринлари ташкил этилиши, аҳолига кўрсатилаётган хизматлар тури ва сифати ошиши кутилмоқда.

Умуман олганда, Дарғали маҳалласида амалга оширилаётган лойиҳалар ўзаро чамбарчас боғлиқ бўлиб, ҳудудни комплекс ривожлантиришга хизмат қилмоқда. Йўл ва дренаж тизимларининг яхшиланиши, электр таъминотининг мустаҳкамланиши, суғориш инфратузилмасининг модернизация қилиниши, шунингдек, савдо ва хизмат кўрсатиш обектларининг ташкил этилиши маҳалла ҳаётида янги имкониятларни юзага келтирмоқда.

Энг муҳими, мазкур ишларнинг барчаси инсон қадри ва аҳоли манфаатларини таъминлашга қаратилган. Яхши йўл, барқарор электр таъминоти, самарали суғориш тизими, обод ва замонавий кўчалар ҳамда янги хизмат кўрсатиш нуқталари — буларнинг барчаси Дарғали маҳалласида қулай яшаш муҳитини яратиш, аҳоли даромадларини ошириш ва тадбиркорлик учун янада кенг имкониятлар яратишга хизмат қилади.

Шу тариқа, маҳаллада амалга оширилаётган комплекс лойиҳалар ҳудуднинг бугунги қиёфасини ўзгартириш билан бирга, унинг келгусидаги ижтимоий-иқтисодий ривожи учун ҳам мустаҳкам пойдевор бўлиб хизмат қилади.