Бухоро вилояти ҳокимлиги

Ўтган асрнинг 80-йилларида барпо этилган мазкур таълим муассасаси 2008 йилда жорий таъмирланган бўлиб, бугунги кунда давлатимиз раҳбарининг энергия самарадорлигини оширишга қаратилган сиёсати доирасида тўлиқ реконструкция қилинмоқда.

Лойиҳа Ўзбекистон Республикаси Вазирлар Маҳкамасининг 2025 йил 7 майдаги 300-сонли «Энергия самарадорлигини оширишга қаратилган лойиҳаларни жадаллаштириш чора-тадбирлари тўғрисида»ги қарори асосида амалга оширилмоқда.

1176 нафар ўқувчига мўлжалланган мактабда амалга оширилаётган қурилиш-таъмирлаш ишлари натижасида бино замонавий меъморий ечимлар, энергия самарадорлиги юқори бўлган муҳандислик-коммуникация тизимлари ҳамда қулай таълим муҳити билан таъминланади. Лойиҳа доирасида бино конструкциялари мустаҳкамланиб, ички ва ташқи пардозлаш ишлари, том қисми, иситиш, электр таъминоти, сув таъминоти, канализация ва санитария тармоқлари тўлиқ янгиланмоқда.

Қурилиш-монтаж ишлари пудратчи ташкилот — "Qoraun Inshoot Qurilish" МЧЖ томонидан белгиланган меъёр ва талаблар асосида амалга оширилмоқда. Айни пайтда қурилиш майдонида 15 та бригада таркибида 150 нафардан ортиқ малакали ишчи ва мутахассис фаолият юритмоқда. Барча ишлар тасдиқланган лойиҳа-смета ҳужжатлари ҳамда амалдаги қурилиш меъёрлари асосида бажарилмоқда.

Умумий қиймати 23 миллиард 664 миллион сўм бўлган мазкур ижтимоий аҳамиятга эга лойиҳа якунлангач, ўқувчилар ва педагоглар учун замонавий, хавфсиз, энергия тежамкор ва барча қулайликларга эга таълим муҳити яратилади. Бу эса таълим сифати ва ўқув жараёни самарадорлигини янада оширишга хизмат қилади.

Вилоят ҳокимлиги матбуот хизмати