Бухоро вилояти ҳокимлиги

Олиб борилган ўрганишлар натижасида маҳаллий ҳамда хорижий сайёҳлар хавфсизлигини таъминлаш, оммавий тадбирлар давомида кўнгилсиз ҳодисаларни олдини олиш, тадбир ўтказиладиган ҳудудларга транспорт воситалари ҳаракатини вақтинча чеклаш мақсадида Бухоро шаҳрининг эски шаҳар қисмида 20 та нуқта белгилаб олиниб, ўрнатилиши лозим бўлган замонавий “таранга қарши мослама”лар бўйича Бухоро вилояти ҳокимлиги, Бухоро вилояти Ички ишлар бошқармаси ҳамда шу соҳада кўп йиллик тажрибага эга бўлган лойиҳа институти ва бошқа корхоналар ходимлари билан ҳамкорлик таклифлари тайёрланган.

Бугун, 24 июль куни вилоят ҳокими Ботир Зарипов ҳузурида "Intelligence System" МЖЧ томонидан ишлаб чиқилган лойиҳа тақдимоти ўтказилди. 

Тақдимотда қайд этилишича, Бухоро шаҳрининг тарихий қисмидаги мавжуд инфратузилмани узлуксиз фаолият олиб боришини таъминлаш, қурилиш ишлари олиб борилаётган жойларда тирбандликларни олдини олиш ҳамда молиялаштиришни оптималлаштириш мақсадида режалаштирилаётган лойиҳани 4 босқичда амалга ошириш юзасидан чора-тадбирлар белгиланган.

Биринчи босқичда тарихий қисмнинг 5 та нуқтаси ажратиб олиниб, “Хўжа Нуробод” (6-мактаб), “Самарқанд” (1-сон оилавий поликлиника),”Афросиёб” (Арк қалъаси),  Баҳоуддин Нақшбанд  (шаҳар ЁХБ биноси олдида) кўчаларида ҳамда “Сомонийлар истироҳат боғи”га кириш йўлагида замонавий “таранга қарши мослама”ларни ўрнатиш режалаштирилмоқда.
Тақдимот давомида вилоят ҳокими томонидан мутасаддиларга мосламалар ўрнатиладиган ҳудудларни топосъёмка (топографик чизма)ларини тақдим этиш, режалаштирилган ишларнинг самарадорлигини ошириш мақсадида ишчи гуруҳ тузилиб, Тошкент ҳамда Самарқанд тажрибасини ўрганиш юзасидан топшириқлар берилди.

Вилоят ҳокимлиги матбуот хизмати