Бухоро вилояти ҳокимлиги

Туманда таълим сифатини янада ошириш, эртамиз эгалари талаб даражасида билим олишлари учун замонавий шарт-шароит яратиш мақсадида “Buxoriy еducation” нодавлат таълим маскани тантанали очилиш маросими бўлиб ўтди. 
 

Мазкур замонавий таълим масканида айни пайтда 50 нафар ўқувчи пухта таҳсил олиш имконига эга. Уларга дарс машғулотлари замонавий педагогик ёндашувлар, инновaцион дастурлар ва рақамли технологиялар асосида ташкил этилган бўлиб, ўқувчилар учун бунда зарур дарслик ва адабиётлар, кўргазмали воситалар, бошқа қулайликлар яратилган. Таълим масканига ташкилий-таълим масалалари бўйича Икром Ҳакимов масъул этиб белгиланган.

 

Таълим маскани очилишида туман мутасаддилари, мактабгача ва мактаб таълими бўлими масъуллари, жамоатчилик вакиллари иштирок этиб, унда сўзга чиққанлар ёшларни самимий табриклаб, ўқув масканининг ёшлар келажагини таъминлашдаги ўрни хусусида  тўхталдилар. 

            

Таълим тизимидаги янгиликларни ўзида татбиқ этаётган масканда тажрибали устозлар фаолият юритмоқда. Жумладан, математика фанидан Илҳом Бақоев, инглиз тили фани ўқитувчиси Умид Ахтамов хорижий тилларни ўқитиш борасида катта салоҳиятга эга педагоглардан ҳисобланишади. 

            

Шунингдек, республика Вазирлар Маҳкамасининг 365-сонли қарори асосида ижтимоий реестрда рўйхатда турган, билим олишга интилувчан ижтимоий муҳофазага олинган оилалар фарзандлари, илмга чанқоқ ўқувчилар учун бунда таълим хизматлари бепул ташкил этилмоқда. 

           

Қолаверса, ўқувчиларнинг интеллектуал салоҳиятини ошириш ва билимларини мустаҳкамлаш мақсадида ҳар ой “Заковат” турнирларини ўтказиш режалаштирилган бўлиб, бу орқали уларнинг билим ва кўникмалари мунтазам синовдан ўтказилади.