Ғиждувон: юртимиз мустақиллигининг 35 йиллигига 70 та маҳаллада ободонлаштириш ва бунёдкорлик ишлари жадаллашди
2026-07-20 10:00:00 / Янгиликлар
Давлатимиз раҳбари раислигида жорий йилнинг 16 июль куни бўлиб ўтган видеоселектор йиғилишида маҳаллаларда янги муҳит яратиш, "Маҳалла еттилиги" фаолиятини тубдан такомиллаштириш ҳамда Ватанимиз Мустақиллигининг 35 йиллигини юксак савияда нишонлаш мақсадида "Маҳаллада ободлик ва меҳр-саховат ойлиги" эълон қилинди.
Бу борада Президентимиз томонидан белгилаб берилган устувор вазифалар ижросини таъминлаш мақсадида Ғиждувон туманининг барча, 70 та маҳалла фуқаролар йиғини ва улардаги қишлоқларда кенг кўламли ободонлаштириш, бунёдкорлик ва санитария-тозалаш ишлари жадал бошланган. Бугун маҳалла гузарлари, кўча ва хиёбонлар, хонадонлар, ҳовли-жойлар атрофи, савдо шахобчалари, ижтимоий соҳа иншоотлари, қабристонлар ҳамда халқаро аҳамиятга эга “М-37” автомобил йўли бўйлаб ҳудудларни тартибли ва ораста кўринишга келтириш ишлари жадал суръатда олиб борилмоқда.
Ҳар бир маҳаллада "Маҳалла еттилиги", давлат ва жамоат ташкилотлари, нуронийлар, ёшлар ҳамда кенг жамоатчилик вакиллари бирлашиб, юрт ободлиги йўлида фидокорона меҳнат қилинаётганини кўриш мумкин. Кўчалар ва йўлаклар тартибга келтирилмоқда, ариқ-зовурлар тозаланмоқда, ноқонуний чиқиндилар бартараф этилмоқда, қабристонлар ва жамоат масканлари обод қиёфа касб этмоқда.
Жумладан, шу кунларда Абдухолиқ Ғиждувоний, Буктарой, Дилкушо, Тахтахон, Лабирўт, Сармижон, Ғовшун, Помўза, Зарангари, Соктари, Халқобод каби маҳаллаларда ободонлаштириш ишлари жамоатчилик вакиллари, фаоллар, оқсоқолллар, меҳнат жамоалари, ёшлар иштирокида уюшқоқлик билан олиб борилмоқда.
Ободонлаштириш тадбирлари билан бир қаторда профилактик рейдлар ҳам олиб борилмоқда. Ички ишлар органлари ходимлари томонидан аҳоли масканларида хонадонларнинг ички ва ташқи ҳудудларини озода сақлаш, санитария қоидаларига риоя этиш бўйича тушунтириш ва огоҳлантириш ишлари олиб борилмоқда. Берилган огоҳлантиришларга қарамай, ободонлаштириш талабларига бепарво муносабатда бўлган айрим фуқароларга нисбатан Ўзбекистон Республикаси Маъмурий жавобгарлик тўғрисидаги кодексининг 161-моддаси асосида маъмурий чоралар қўлланилмоқда.
Обод маҳалла — фаровон ҳаёт пойдевори, озода ҳудуд эса юксак маданият ва фуқаролик масъулиятининг ёрқин ифодасидир. Энг азиз ва энг улуғ байрам—мамлакатимиз мустақиллигининг қутлуғ 35 йиллигини муносиб кутиб олиш йўлида амалга оширилаётган бу хайрли ташаббус ва эзгу ишлар Янги Ўзбекистон бунёдкорлик сиёсатининг амалий натижасидир. Зеро, бугун маҳалла ва қишлоқларимиз ободлиги, кўчамиз озодалиги ва хонадонимиз саришталиги йўлида барча ғиждувонликлар ҳам масъулиятни ўз зиммаларига олмоқдалар.
Вилоят ҳокимлиги матбуот хизмати