Ғиждувон: Ҳавзак маҳалласида 70-сонли давлат мактабгача таълим ташкилоти фойдаланишга топширилди
2026-07-10 17:15:00 / Янгиликлар
Мактабгача таълим тизимини тубдан ривожлантириш, фарзандларимиз эртаси ва барвақт савод чиқаришлари учун қулай таълим муҳитини яратиш борасида Ғиждувон туманида ҳам кўзга кўринарли ишлар амалга оширилмоқда.
Ана шундай хайрли ҳаракатларнинг амалий ифодаси сифатида куни кеча туманнинг “Ҳавзак” маҳалла фуқаролар йиғинида аҳолининг кўпдан орзиқиб кутган янгилиги рўй берди. Ҳавзакликлар учун 70-сонли давлат мактабгача таълим ташкилоти тантанали равишда фойдаланишга топширилди. Эндиликда болалар боғчаси 120 нафар жажжи ўғил-қизни ўз бағрига олмоқда.
Сўлим табиат қўйнида барпо қилинган болалар боғчаси лойиҳаси "Қишлоқ қурилиш лойиҳа" томонидан ишлаб чиқилган бўлиб, қурилиш ишлари маҳаллий пудратчи "Fast quality building" МЧЖ ишчи-мутахассислари томонидан амалга оширилди. Замонавий меъморий ечимлар асосида бунёд этилган шинам иншоотда жажжи болажонларнинг талаб даражасида таълим-тарбия олишлари, интеллектуал ва жисмоний ривожланишлари учун барча шарт-шароит яратилган.
Тадбирда туман ҳокимлиги, мактабгача ва мактаб таълими бўлими масъуллари, жамоатчилик вакиллари, ота-оналар ҳозир бўлдилар. Иншоот рамзий лентаси қирқилгач, тадбирда йиғилганлар муассасада болажонлар учун яратилган қулайликлар билан яқиндан танишдилар. Болалар ўйин ва машғулот хоналари, спорт майдончалари, ётоқхона ва ошхона, санитария ва иситиш тармоқлари талаб даражасида жиҳозлангани барчани мамнун қилди.
Тадбирда сўз олган мутасадди ва меҳнат фахрийлари юртимизда ҳукм сураётган тинчлик ва осойишталик, халқ фаровонлигини юксалтириш, ёш авлод камолоти йўлида амалга оширилаётган эзгу ислоҳотлар учун ўз самимий миннатдорликларини изҳор этдилар. Ушбу маскан бунёдкорлик ишига муносиб ҳисса қўшган қурувчилар эътироф қилиниб, уларга тўн кийдирилди. Зеро, бугун эртамиз эгалари таълим-тарбиясига қаратилган ҳар бир бунёдкорлик лойиҳаси — Янги Ўзбекистоннинг порлоқ келажагига қўйилган мустаҳкам пойдевордир.
Маълумот учун, айни кунда туманда мактабгача ёшдаги, яъни 3-7 ёшли болалар сони 25,5 минг нафардан ошган бўлса, уларнинг мактабгача таълим тизимига қамров даражаси 96 фоизга етказилган. Ҳозирда туман миқёсида 48 та давлат мактабгача таълим ташкилоти, 4 та давлат хусусий шерикчилигидаги ҳамда 329 та оилавий мактабгача таълим ташкилоти фаолият кўрсатиб келмоқда.
Вилоят ҳокимлиги матбуот хизмати