Когон: "Тараққиёт" маҳалласида ҳам томорқа баракаси хонадон файзига айланмоқда
2026-06-21 15:30:00 / Янгиликлар
Айни кунда туманда қарийб 21 минг нафар томорқа ер эгаси мавжуд бўлиб, деҳқон хўжаликлари билан қўшганда, улар тасарруфидаги томорқа экин ери майдони 2 минг 128 гектарни ташкил этади. Мазкур ер майдонларидан оқилона фойдаланиш ҳисобига аҳоли томонидан йил давомида пешма-пеш қишлоқ хўжалиги маҳсулотлари етиштирилиб, ички бозордаги сабзавот-полиз, дуккакли маҳсулотлар, озиқ-овқат таъминотига муносиб ҳисса қўшилмоқда.
Ҳудудда томорқачилик билан шуғулланаётган хонадонлар асосан помидор, бодринг, картошка, пиёз, карам, булғор қалампири, сабзи, ловия каби сабзавот етиштириш билан бир қаторда лимон, апелсин сингари цитрус мевалар, яна қулупнай етиштириб, аҳоли дастурхони тўкинлигига ҳисса қўшмоқдалар. Натижада йилнинг тўрт фаслида аҳолини сархил ва сифатли маҳсулотлар билан таъминлаш имконияти яратилмоқда.
“Тараққиёт” маҳалла фуқаролар йиғини Брешим қишлоғида истиқомат қилувчи Дилшод Ҳомидов ана шундай илғор ва ташаббускор томорқа эгаларидан биридир. У ўз ҳовлиси этагидаги томорқа ерининг 6 сотихдан иборат қисмида иссиқхона ташкил этиб, айни мавсумда бодрингни серҳосил навидан етиштирмоқда. Ҳозирда иссиқхона шароитида етиштирилган ҳосилни йиғиб-териб олиш ишлари қизғин давом этмоқда.
Миришкор томорқачининг айтишича, уруғ ва кўчатда гап кўп. Танланган бодринг нави кучли илдиз ва пояга эга бўлиб, ҳароратнинг кескин ўзгаришларига ҳам нисбатан чидамлилиги билан ажралиб туради. Агротехник тадбирларнинг ўз вақтида ва сифатли бажарилгани натижасида иссиқхонада юқори ҳосилдорликка эришилган. Мавсум якунига қадар бу иссиқхонадан қарийб 9 тонна бодринг ҳосили олиш ҳисоб-китоб қилинмоқда.
Хонадон эгалари хомчўтига биноан, етиштирилаётган маҳсулотнинг бозор қиймати 40 миллион сўмдан ортиқ даромад келтириши кутилмоқда. Бу эса томорқа еридан самарали фойдаланиш орқали оилавий даромадни ошириш, рўзғор тўкинлигини таъминлашнинг оддий ва синовдан ўтган йўли.
Вилоят ҳокимлиги матбуот хизмати