Бухоро вилояти ҳокимлиги

Қарор ижросини таъминлаш мақсадида Когон туманида ҳам аҳолининг узоқ йиллардан буён ечимини кутиб келаётган муаммоларини бартараф этиш, ички йўллар ҳолатини яхшилаш, замонавий муҳандислик-коммуникatsiя тармоқларини ривожлантириш, қулай яшаш шароитларини яратишга қаратилган лойиҳалар изчил рўёбга чиқарилмоқда. 
Жумладан, Баҳоуддин Нақшбанд маҳалласида бу лойиҳа доирасида узунлиги 10,6 минг метр бўлган ички йўлни таъмирлаш ва асфальт қопламаси бостириш режалаштирилган бўлиб, айни кунда қурилиш-таъмирлаш ишлари талаб даражасида олиб борилмоқда.
Мазкур ишларни пудратчи ташкилот “Газли йўл қуриш-таъмирлаш” масъулияти чекланган жамияти мутахассислари замонавий техника ва механизмлар ёрдамида амалга оширмоқда. Қурилиш жараёнида йўлнинг асос қисми қайта текисланиб, мустаҳкам пойдевор қатлами барпо этилмоқда. Бу келгусида йўлнинг узоқ муддатда хизмат қилиши, транспорт қатнови учун қулайлик яратишида муҳим аҳамият касб этади.
Айни пайтда маҳалланинг Чорчинор қишлоғида ҳам 1,5 минг метр узунликдаги йўл қисмини асфальтлаштириш ишлари олиб борилмоқда. Мутахассислар томонидан йўлнинг техник ҳолати тўлиқ ўрганилиб, қурилиш меёрлари ва стандартлари асосида зарур тайёргарлик ишлари бажарилмоқда. 
Бундан ташқари, Чорчинор ҳамда Работипоён қишлоқларида аҳоли хавфсизлигини таъминлаш, тунги пайтда пиёдалар ва транспорт воситалари ҳаракати учун қулай шарт-шароит яратиш мақсадида муқобил энергия манбалари асосида ишловчи замонавий “Led” ёритиш мосламалари ўрнатилди. Бу энергия тежамкор ёритгичлар нафақат электр энергиясидан самарали фойдаланиш имконини беради, балки экологик жиҳатдан ҳам самаралидир. Муҳими, мазкур лойиҳалар натижасида фуқаролар учун қулай ва хавфсиз яшаш муҳити яратилиб, уларнинг эртанги кунга бўлган ишончи янада мустаҳкамланмоқда.
Вилоят ҳокимлиги матбуот хизмати