Бухоро шаҳри: 14-сонли давлат мактабгача таълим ташкилоти қайта таъмирланмоқда
2026-06-10 19:15:00 / Янгиликлар
Шу боис, ҳудудда ижтимоий инфратузилма иншоотлари қаторида мактабгача таълим масканлари моддий-техник аҳволини янгилаш, уларда энергия тежамкор ва инновацион қурилиш технологияларини жорий этиш ишлари изчил амалга оширилмоқда.
Жумладан, Бухоро шаҳрида ўтган аср етмишинчи йилларида барпо қилинган 14-сонли давлат мактабгача таълим ташкилоти айни пайтда 140 ўринга мўлжалланган бўлиб, шу кунга қадар таъмир кўрмаган, болажонлар учун кўпдан кутилган реконструкцияга муҳтож эди. Бугунга келиб мазкур муассасада кенг кўламли мукаммал таъмирлаш ишлари олиб борилмоқда. Қурилиш-пудрат ишлари танлов асосида масъулияти чекланган жамияти «Капитал сифат сервис» бинокорлари томонидан амалга оширилмоқда.
Лойиҳанинг умумий қиймати 7 миллиард сўмни ташкил этиб, айни кунда мазкур иншоотда замонавий қурилиш стандартлари асосида янгилаш-бутлаш ишлари давом эттирилмоқда. Хусусан, бино ички муҳандислик-коммуникатсия тармоқлари тўлиқ реконструкция қилиниб, энергия самарадорлигини оширишга қаратилган замонавий иссиқлик тизими— «иссиқ пол» технологияси ўрнатилмоқда.
Мазкур реконструкция ишлари тўла-тўкис якунлангач, тарбияланувчилар учун барча қулайликларга эга, замонавий ва шинам таълим маскани фойдаланишга топширилиши кўзда тутилган. Таъмирлаш ишлари яқин икки ойда якунига етказилиб, бунда талаб даражасидаги жиҳозлаш ва ободонлаштириш ишлари амалга оширилади.
Вилоят ҳокимлиги матбуот хизмати