Бухоро вилояти ҳокимлиги

Мазкур дастур доирасида Шофиркон туманида таълим, мактабгача таълим ва соғлиқни сақлаш муассасалари инфратузилмасини яхшилаш, уларни замонавий талаблар асосида реконструкция қилиш, энергия тежамкор тизимлар билан жиҳозлаш мақсадида қарийб 50 миллиард сўм маблағ йўналтирилмоқда. 

Худди шундай, дастур доирасида умумий қиймати 35 миллиард сўмдан ортиқ маблағ ҳисобидан тумандаги қатор умумтаълим мактабларида мукаммал таъмирлаш ишларини бажариш кўзда тутилган. Жумладан, Хўжа Ориф маҳалласидаги 1-сонли умумтаълим мактаби, Дўрмен маҳалласидаги 27-сонли умумтаълим мактаби, Талисангобод маҳалласидаги 32-сонли умумтаълим мактаби ҳамда Хорин маҳалласидаги 48-сонли умумтаълим мактабини замонавий кўринишга келтириш талаби қўйилган. 

Таълим муассасаларида амалга ошириладиган қурилиш-таъмирлаш ишлари натижасида ўқув хоналари, лабораториялар, спорт заллари ва ёрдамчи бинолар янгиланиб, ўқувчилар учун янада қулай ва хавфсиз таълим муҳити яратилади. Муҳими, бу лойиҳалар орқали энергия тежамкор технологиялар жорий этилиб, бинолар иссиқлик самарадорлиги сезиларли даражада оширилади.

Шунингдек, мактабгача таълим тизимини ривожлантириш дастурнинг устувор йўналишларидан бири ҳисобланади. Айни кунда ҳудуддаги мактабгача таълим ташкилотларини реконструкция қилиш учун қиймати 11 миллиард 100 миллион сўм маблағ ажратилган. Масалан, бу сармоя ҳисобидан Султонобод маҳалласидаги 18-сонли, Шодлик маҳалласидаги 19-сонли ҳамда Нурафшон маҳалласидаги 30-сонли мактабгача таълим ташкилотларида мукаммал таъмирлаш ишлари амалга оширилади.

Бу лойиҳалар натижасида болажонлар учун замонавий, қулай ва хавфсиз тарбия шарт-шароити яратилади. Гуруҳ хоналари, ошхоналар, ётоқхона ва ўйин майдончалари, санитария тармоғи янгиланиб, энергия тежамкор ускуналар билан жиҳозланади. Пировардида эса 270 нафардан ортиқ жажжи ўғил-қиз учун замонавий талабларга мувофиқ муҳит яратилади. 

Бундан ташқари, аҳолига кўрсатилаётган бирламчи тиббий хизмат сифатини яхшилаш ҳам мазкур дастурдан ўрин олган. Бу жараёнда белгиланган мақсадлар учун 4 миллиард 400 миллион сўм маблағ йўналтирилган бўлиб, Жўшўра маҳалласидаги 43-сонли тиббий поликлиника ва Алишер Навоий маҳалласидаги оилавий шифокорлик пунктида таъмирлаш ва реконструксия ишлари бажарилади. 

Тиббиёт муассасалари янгиланиши натижасида аҳоли учун тиббий хизмат кўрсатиш сифати ва қамрови ошади. Шунингдек, замонавий диагностика ва хизмат кўрсатиш имкониятлари кенгайиши натижасида муассасаларга мурожаат билан келадиган аҳоли вакилларини профилактик даволаш ва ташхис қўйиш ишлари самарадорлиги оширилади. 
Юқорида амалга ошириладиган барча лойиҳалар якунига етказилгач, 2376 нафар ўқувчи замонавий ва шинам таълим муассасаларида билим олиши, 270 нафар болажон янгиланган боғчаларда тарбияланиши, қолаверса, юзлаб фуқаро янада сифатли тиббий хизматлардан фойдаланиш имкониятига эга бўлади. 

Бу каби амалга оширилаётган бунёдкорлик ишлари туманда инсон манфаатларини таъминлаш, ёш авлод учун муносиб таълим-тарбия шароитларини яратиш, аҳоли турмуш маданиятини янада оширишга қаратилгани билан аҳамиятлидир.

Вилоят ҳокимлиги матбуот хизмати