Бухоро вилояти ҳокимлиги

Негаки, уларда дастурхон тўкинлиги баробарида даромад топиш, рўзғорнинг кам-кўстини қоплаш, таъбир жоиз бўлса, “йўқни йўндириш”  тажрибаси шаклланган. 
 

Айни вақтда эса томорқадан фойдаланиш ҳукумат томонидан қўллаб-қувватланаётгани, қўшимча имтиёз сифатида субсидия ва кредитлар ажратилиб, оилавий тадбиркорлик билан шуғулланиш истагида бўлганлар учун шарт-шароит яратилаётгани айни муддао.
 

Қоракўл тумани, Қулончи маҳалласда ҳам аҳоли бандлигини таъминлаш, даромад манбаини ошириш ҳамда камбағалликни қисқартириш бўйича бир қанчаа ишлар амалга оширилмоқда. Ҳудудда умумий қиймати 4 миллиард сўм бўлган 5,5 минг метр масофадаги суғориш тармоғи ўзани бетонлаштирилгани айни пайтда  маҳалла аҳолисини томорқадан унумли фойдаланишига замин яратди. 
 

Фахриддин Ўринов ҳам шу маҳаллада яшовчи меҳнаткаш томорқачилардан бири. Бугун бу хонадон аъзолари томорқасини обод қилиб, рўзғор ва дастурхон тўкинлигини таъминламоқда. Эрта баҳордан 8 сотихли томорқа ерида булғор қалампири, бақлажон, помидор ниҳолллари ўтқазилиб, парваришланган. Бугунга келиб жўякларда ҳосил пишиб етилмоқда. Кунора тайёр сархил маҳсулот бозорга чиқарилоиб, кунлик ўртача 1 миллион сўмгача даромадга эришилаётгани ҳалол пешона тери маҳсули, албатта. 
 

— Авваллари томорқани суғоришда қийинчиликка дуч келардик. Артезиан қудуқ орқали суғорганимиз билан барибир, ариқдаги оқар сувдек аҳамияти бўлмасди. Қишлоғимиздан ўтган канал ўзанини бетонлаштириб берганларга минг раҳмат,—дейди Фахриддин Ўринов.—Ҳозирда экин еримизни суғоришдаги ташвиш-муаммолар ариди. Сув бўлса, томорқада ҳосил сероб бўлади. Ҳосил яхши бўлса, рўзғорга фойда. 
 

Кўриниб турибдики, экин ерини астойдил обод қилаётган биргина оиланинг орзу-ҳаваси ҳалол меҳнат туфайли рўёбга чиқмоқда. Зеро, интилган, меҳнат қилган одам учун қут-барака ҳаракат, сабр ва изланиш билан келади.