Бухоро вилояти ҳокимлиги

Ниёзҳожи маҳалласи, Вадан қишлоғида истиқомат қилувчи Жумагул Тошева ҳам айни кунда ўзининг ҳалол, самарали меҳнати билан оиласи турмуш тарзини яхшилашга муносиб ҳисса қўшаётган меҳнаткаш оила бекаларидан бири. У томорқаси ва ундаги иссиқхонадан йил давомида унумли фойдаланиб, деҳқончиликдан даромад топмоқда. Муҳими, ҳалол меҳнат ортидан келаётган файз-барака тотув оиланинг турмушида яққол сезилмоқда.

Айни кунда хонадонда барпо қилинган 2 сотихдан иборат иссиқхонада помидор ҳамда 1 сотих ерда бодринг етиштирилмоқда. Ҳар бир ниҳолга меҳр билан қаралиб, агротехник тадбирлар ўз вақтида, талаб даражасида амалга оширилаётгани боис, экинлар серҳосил бўлиб ўсмоқда. Деҳқончилик ишларида  оила аъзолари бирдек жонбозлик кўрсатишмоқда. Ана шундай аҳиллик ва меҳнатсеварлик туфайли мўжазгина томорқадан мўмай даромад олиш мумкинлиги амалда намоён қилинмоқда. 

 —Иссиқхонамиз ерида оила аъзоларимиз билан биргаликда тер тўкиб, ҳар бир ишни ўз пайтида бажаришга уринамиз. Помидор ва бодринг парваришида агротехник тадбирларни тўғри ташкил этганимиз боис, мўл ҳосилдорликка эришмоқдамиз,—дейди Жумагул Тошева самимий кулиб.—Ҳозирда бу еримиздан қарийб 700 килограмм ҳосил олишни кутаяпмиз. Насиб этса, эришадиган фойдамиз ҳам чаккимас. 

Шунингдек, хонадонда чорвачиликка ҳам эътибор қаратилиб, яхшигина  даромад кўриб келинмоқда. Ҳозирда хонадонда 5 бош қорамол парвариш қилинмоқда. Айниқса, 2025 йилда харид қилинган 2 бош, швед зотли сигир оила даромадини янада оширишга хизмат қилмоқда. Сермаҳсул бу зотдор сигирлардан кунига деярли 45 литр сут соғиб олинмоқда. Табиийки, ҳалол меҳнат эвазига хонадон дастурхонидан сут, қатиқ, сариёғ аримайди. Бу ҳам нафақат бир оила эҳтиёжини қондириш, балки қўшимча даромад топиш имконини бермоқда. 

Шулардан хулоса қилинса, биргина Тошевлар уй хўжалиги фаолияти мисолида ҳалол меҳнат, сабр ва интилиш билан хонадонда файзу баракага эришиш мумкинлигига яна бир бор ишонч ҳосил қилиш мумкин. 

Вилоят ҳокимлиги матбуот хизмати