Бухоро вилояти ҳокимлиги

Туман марказида бир қатор давлат ташкилотлари ҳамда корхоналарнинг замонавий маъмурий бинолари бунёд этилиб, аҳолига хизмат кўрсатиш сифати янада яхшиланмоқда. Шу билан бирга, когонликларнинг ишдан бўш пайтида мазмунли ҳордиқ чиқариши, ёшларнинг бўш вақтини самарали ташкил этиш мақсадида янги маданият ва истироҳат боғи барпо қилиниб, у бугун ҳудуддаги гавжум масканлардан бирига айланмоқда.
             
Шу кунларда туман марказида яна бир нечта муҳим ижтимоий соҳа иншоотлари қад ростламоқда. Жумладан, санитария-эпидемиологик осойишталик ва жамоат саломатлиги туман бўлими ҳамда давлат солиқ инспекциясининг замонавий маъмурий бинолари қурилиши жадал суръатда давом эттирилмоқда.
  
Жумладан, замонавий андозадаги санитария-эпидемиологик осойишталик ва жамоат саломатлиги бўлими биноси 3 қаватли иншоот бўлиб, «Янги замон прожект» МЧЖ лойиҳаси асосида, пудратчи «Бест стеэл мастерс» МЧЖ бинокорлари томонидан қурилмоқда. Мазкур иншоотлар нафақат ҳудуд инфратузилмасини янада мустаҳкамлаш, балки аҳолига кўрсатилаётган хизматлар сифатини оширишга ҳам хизмат қилади.
            
Ушбу эзгу ва улкан бунёдкорлик ишлари давомийлигини таъминлаш мақсадида мазкур иншоотларда вилоят солиқ бошқармаси, туман ҳокимлиги, тегишли масъуллар томонидан кундалик назорат ишлари олиб борилмоқда. Аҳамиятли жиҳати, янги барпо этилаётган иншоотлар аҳоли турмуш фаровонлиги, ҳудуд тараққиёти ва келажак авлод учун муносиб ҳаёт барпо этишга хизмат қилади. 

Вилоят ҳокимлиги матбуот хизмати