Когон тумани: “Сараён”да ҳам янгиланиш, таъмирлаш, ободонлаштириш ишлари кўпларни хурсанд қилмоқда
2026-05-16 20:30:00 / Янгиликлар
“Сараён” маҳалла фуқаролар йиғинида бугунга келиб аҳоли сони 4 мингга яқинлашган бўлса, уларнинг 1 600 нафарга яқини ёшлардир. Бу маҳаллада хонадон сони 678 та, оила сони 821 тага етган, ишсизлар сони ўтган йили бошида юзга яқинни ташкил этиб, кам таъминланган эҳтиёжманд оилалар сони эса 46 та эди. Шу боис, ҳудудда бандликни таъминлаш, оилаларга даромад манбаини яратиш, савдо ва маиший хизмат кўрсатиш тармоғини ривожлантириш, оилавий тадбиркорликка кенг йўл очиш, қолаверса, томорқадан унумли фойдаланиш чоралари кўрилмоқда.
Аниқроғи, ўтган йил давомида Сараёнда юздан ортиқ фуқаронинг бандлиги таъминланган. Жумладан, оилавий тадбиркорликни ривожлантириш ҳисобига 42 нафар, 10 сотихдан томорқа ер майдони ажратиш ҳисобига 65 нафар, мавжуд бўш (вакант) иш ўринларига ишга жойлаштириш бўйича 32 нафар, корхоналарда норасмий ишлаётган ишчиларни легаллаштириш бўйича 64 нафар нафар фуқаро ишли бўлган.
Шу қаторда ҳудуд инфратузилмасини замон талаби асосида ривожлантириш, фуқаролар учун қулай ва хавфсиз муҳитни шакллантириш борасида Сараёнда салмоқли ишлар амалга оширилмоқда. Хусусан, ижтимоий соҳа иншоотлари барпо этилиб, ички ва маҳаллий йўллар таъмирланмоқда, муҳандислик-коммуникatsiя тармоқлари янгиланмоқда.
Айни кунда Давлатимиз раҳбарининг 2021 йил 18 сентябрдаги ПҚ-5246-сонли “Ислом тараққиёт банки ва ОПЭК халқаро тараққиёт жамғармаси иштирокида қишлоқ жойларни барқарор ривожлантириш лойиҳасини амалга ошириш чора-тадбирлари тўғрисида”ги қарори асосида маҳаллада инфратузилма иншотлари қурилмоқда.
Мавжуд таълим ва мактабгача таълим муассасалари таъмирталаб ҳолга келгани боис мукаммал реконструкция қилиниб, моддий-техник имкониятлари яхшиланмоқда. Шунингдек, аҳолига сифатли тиббий хизмат кўрсатиш мақсадида замонавий талабларга жавоб берадиган оилавий шифокорлик пункти қайта бунёд этилаётгани ҳудудда аҳолига тиббий хизмат кўрсатиш имкониятларини оширади.
Маҳаллада ичимлик суви таъминотини яхшилаш, аҳолини тоза ичимлик суви билан узлуксиз таъминлаш, электр энергияси таъминоти барқарорлигини ошириш мақсадида янги тармоқлар тортиш ҳамда мавжудларини модернизaция қилишга эътибор кучайган.
Йўл инфратузилмасини ривожлантириш мақсадида шу кунларда Сараён маҳалласидаги ички йўлнинг қарийб 3,5 километрлик қисми "Чорбакр таъмир қурилиш сервис" МЧЖ йўлсозлари томонидан асфальтлаштирилди. Мазкур амалий ишлар натижасида маҳалла аҳолиси учун транспорт ҳамда аҳоли қатнови янада қулайлашиб, ҳудуд қиёфаси тубдан яхшиланмоқда.
Вилоят ҳокимлиги матбуот хизмати