Шофиркон: пилла қабул қилиш маскани тобора гавжум кўриниш олмоқда
2026-05-16 10:15:00 / Янгиликлар
Сўнгги йилларда пиллачилик тармоғида давлат шартнома режаларини Шофиркон тумани вилоятда биринчилар қаторида уддалаб, қатор меҳнат муваффақиятини қўлга киритиб келмоқда. Жорий йилда ҳам ҳудуддаги 12 та инкубаторияда жами 4178 қути ипак қурти парваришланиб, 251 тоннага тенг “кумуш тола” хирмонини бунёд қилиш чора-тадбири кўрилди.
Жорий баҳор мавсумида туманда ипак қурти боқувчи звено ва касаначилар сони 2089 нафарга етган. Жумладан, ҳудуддаги 164 та фермер хўжалиги билан 2870 қути, касаначилар билан эса 1308 қути ипак қурти парвариши бўйича шартномалар тузилиб, жараён аниқ режа асосида олиб борилмоқда.
Пиллачилик билан шуғулланаётган оилалар моддий қўллаб-қувватланиб, ҳар қути ипак қурти учун 500 минг сўмдан аванс-бўнак пули ажратилган. Бундан ташқари, Президент қарорига мувофиқ касаначиларга ҳар килограм ҳосил учун 15 минг сўмдан субсидия берилиши белгиланган. Кам таъминланган оилаларга эса пилла боқиш хоналарини таъмирлаш мақсадида 3 йил муддатга, энг кам иш ҳақининг 50 бараваригача ссуда ажратилиши кўзда тутилган.
Пиллакорларга яратилган имкониятлар қаторида ҳосил йиғиб олингач, ҳар бир килограмм пилла учун 40 минг сўмдан ҳақ тўланаётгани, режадан ортиқча етиштирилган маҳсулот ҳар килограми учун 50 минг сўмдан рағбат пули ҳисоблаб берилаётганини эътироф этиш жоиз.
“Саврак” ҳудудидаги пилла қабул қилиш масканида туман ҳокимлиги, буюртмачи “Ромстар” МЧЖ, тегишли масъул мутасаддилар пиллани қабул қилиш жараёнини кундалик назоратга олишган. “Кумуш тола” хирмонига ҳисса қўшаётган пешқадам пиллакорлар шу ерда рағбатлантирилиб, эсдалик совғаларини олишмоқда.
Муҳими, туманда қизғин ўтаётган пилла мавсуми ўнлаб хонадон, касаначи, звенолар учун мўмай даромад, бандлик ва барака манбаига айланган.
Вилоят ҳокимлиги матбуот хизмати