Шофиркон: “Искогаре”да дуал таълим асосида 200 нафар хотин-қиз бандлиги таъминланмоқда
2026-05-13 22:35:00 / Янгиликлар
Шофиркон тумани, Искогаре маҳалласи кўп йилдирки, чекка ва иқтисодий ночор ҳудудлардан бири, ишсизлар сони юқори бўлган “оғир” тоифадаги маҳаллалардан бири сифатида қайд қилинган. Ҳудудни ишсизликдан ҳоли маҳаллага айлантириш, аҳоли бандлигини таъминлаш ва дуал таълим тизимини ривожлантириш мақсадида вилоят ва туман ҳокимликлари ташаббуси билан шу йирик лойиҳа амалга оширилди. Искогаре маҳалласида фаолият бошлаган “Parvoz xumo ravnaq trans” МЧЖнинг тикувчилик корхонаси Шофиркон рақамли технологиялар техникуми билан ҳамкорликда дуал таълим тизимини ривожлантириш, маҳаллада камбағаллик даражасини “нол” қийматга тушириш мақсадини кўзламоқда.
Корхона раҳбари Зафар Раҳимов бошчилигида ташкил этилган бу тикувчилик корхонаси 200 нафар хотин-қизни иш билан таъминлашни мақсад қилган. Асосан эркаклар ва аёллар кийим-кечакларини тикиб тайёрлашга ихтисослашган корхона айни кунда маҳсулотларини Россия, Қозоғистон, Озарбайжон каби республикаларга, ҳатто Италия давлатига экспорт қилмоқда. Хусусан, ўтган йилда Италияга 100 минг АҚШ доллари миқдорида маҳсулот экспорт қилинган бўлса, жорий йилда Шофирконда ишлаб чиқариладиган маҳсулот экспорт ҳажмини 200 минг АҚШ долларига етказиш мақсад қилинган.
Эътиборлиси, масъулияти чекланган жамияти томонидан келгусида туманнинг бошқа маҳаллаларида яна 5 та шундай тикувчилик корхонасини ташкил этиш режалаштирилгани янги иш ўринлари яратиш, аҳоли даромадини оширишда муҳим омил бўлиб хизмат қилади. Айни кунда корхонада фаолият юритаётган хотин-қизлар учун барча шарт-шароит яратилган бўлиб, уларга 2 миллион сўмдан 5 миллион сўмгача ойлик маош тайинланган ва бепул тушлик, транспортда ташиш хизматлари ташкил этилган.
Шофиркон рақамли технологиялар техникумида айни кунда 351 нафар ўқувчи таҳсил олмоқда. Ҳозирда 30 нафар битирувчи ўқувчи қиз мазкур тикув корхонасида амалиёт ўтамоқда. Бу эса дуал таълим тизимининг амалдаги самарали намунаси бўлиб, уларни келгусида доимий иш билан таъминланишига замин яратмоқда.
Рақамли технологиялар техникуми биносида “Parvoz xumo ravnaq trans” МЧЖнинг тикув корхонаси очилишида туман ҳокимлиги, тегишли масъуллар, нуронийлар ҳамда жамоатчилик вакиллари иштирок этдилар.
Вилоят ҳокимлиги матбуот хизмати