Когон: “Баҳоуддин Нақшбанд” ва “Сараён” маҳаллаларида ҳам “кумуш тола” заршунослари оз эмас
2026-04-28 20:40:00 / Янгиликлар
Жорий йил мавсуми олдидан когонлик пиллакорлар Хитой давлатидан келтирилган 3 минг 222 қути ипак қурти парваришидан мавсумда 194 тонна пилла хомашёси етиштириш чора-тадбирини кўрмоқдалар. Бу борада туманнинг 7 та ҳудудидаги 12 та инкубаторияда уруғ жонлантирилиб, касаначи, оилавий звеноларга тарқатилган. Бу йил улар ўтган йилгига қараганда, 215 қутига ёки 15 тоннага кўпроқ “кумуш тола” етиштиришни мақсад қилишган.
Айни баҳорги пиллачилик мавсуми учун ҳудудда юқори ҳосилдорликка эришиб келаётган ва сифатли пилла етиштиришда етарли тажрибага эга 20 тадан ортиқ фермер хўжалиги ҳамда жами 21300 га яқин касаначи ва оилавий звено билан тўғридан-тўғри шартнома тузилган.
Албатта, бу қамров аҳолининг эҳтиёжманд қатлами моддий манфаатдорлигини таъминлашда қўл келмоқда. Қолаверса, пилла боқувчилар ва касаначиларнинг мавсум даврида бажарган ишлари уларга пенсия таъминлашда бир йиллик иш стажи ҳисобланади. Бу имтиёз, албатта, пиллачиликни ривожлантиришда муҳим омил бўлмоқда.
Жумладан, Баҳоуддин Нақшбанд маҳалласида яшовчи кўп йиллик тажрибага эга Ражабой Боқиева оила аъзолари кўмагида пиллачилик билан шуғулланиб, жорий мавсумда 4 қути ипак қуртини парваришламоқдалар. Меҳнаткаш хонадонда 4 қути ипак қуртидан 300 килограмдан ошириб ҳосил олиш тажрибада бор. Иш бошида улар 2 миллион сўм аванс-бўнак пул ва қурт озуқасига етарли тутзорни қабул қилишган. “Ғалвир сувдан кўтарилганда” эса кўзда тутилган даромад салмоғи қарийб 15 миллион сўмни ташкил этмоқда.
Шунингдек, Сараён маҳалласида истиқомат қилувчи Дилноза Атоева ҳам тажрибали касаначилардан бўлиб, оила аъзолари ёрдамида бу йил 8 қути ипак қурти боқмоқда. Бир ойдан ошиқроқ қилинаётган меҳнат маҳсули эса 550 килограм атрофида бўлиб, бундан хонадоннинг эришадиган қўшимча даромади 27 миллион сўм атрофида кутилмоқда.
Сара ва сифатли “кумуш тола” етиштиришда ўзига хос тажрибага эга ҳудудда жорий йилги мавсумда буюртмачи “Кумушкент ипаги” МЧЖ саъй-ҳаракати билан ҳар қутидан олинаётган ҳосил салмоғи ўртача 65 килограмга етиши кўзда тутилмоқда. Умуман, қишлоқ хўжалигида йилнинг дастлабки муваффақиятига эришишда айниқса, Сиёзпоён, Баҳоуддин Нақшбанд, Хўжа якшаба, Янги ҳаёт, Сараён, Ниёзҳожи, Когон ҳудудларидаги оилавий звенолар жонбозлик кўрсатмоқдалар.
Вилоят ҳокимлиги матбуот хизмати