Ўзбекистон Журналистлар уюшмаси Бухоро вилояти бўлими ҳамда вилоят ҳокимлиги ҳамкорлигида Самарқанд шаҳрига медиа-саёҳат ташкил этилди
2026-04-20 15:10:00 / Янгиликлар
Бунда вилоятнинг 30 нафардан ортиқ журналистлари ва ёш ижодкорлар қатнашиб, қадимий шаҳарнинг тарихий ҳамда илмий-маърифий масканлари фаолияти билан яқиндан танишдилар.
Иштирокчилар дастлаб Имом Бухорий мажмуасида бўлишди. Ушбу муқаддас қадамжо кейинги йилларда кенг кўламли ободонлаштириш ишлари натижасида 44 гектар майдонгача кенгайтирилган. Мажмуа таркибида 10 минг кишига мўлжалланган масжид, маъмурият биноси ҳамда тўрт бурчагида 75 метрлик миноралар барпо этилган. Бу иншоотлар мажмуага улкан маҳобат бағишлаб, уни ислом оламидаги энг йирик зиёрат ва маърифат марказларидан бири сифатида намоён этмоқда.
Имом Бухорий мажмуаси зиёрат маскани, ҳадис илми, маънавият ва илмий тадқиқотлар уйғунлашган муҳим марказлиги билан алоҳида аҳамият касб этади. Бу ерда амалга оширилган ишлар аждодлар меросини асраб-авайлаш ва уни келажак авлодга етказиш йўлидаги изчил ислоҳотларнинг амалий ифодасидир.
Шундан сўнг иштирокчилар Ҳадис мактаби фаолияти билан ҳам танишдилар. У ерда ёшлар учун ҳадис илми асослари, манбашунослик ва ислом маънавияти бўйича замонавий ёндашувда таълим берилаётгани таъкидланди.
Навбатдаги манзил Имом Бухорий халқаро илмий-тадқиқот марказида бўлди.
Марказ Ўзбекистон Республикаси Вазирлар Маҳкамаси ҳузурида ташкил этилган бўлиб, Президентнинг 2017 йил 27 мартдаги ПҚ-2855-сонли қарори ижроси асосида фаолият юритмоқда.
Ўтган 9 йил давомида муассаса халқаро илмий майдонда ўз ўрнини мустаҳкамлаб, дунёнинг 50 та етакчи ислом тадқиқот марказлари ҳамда Оксфорд ва Кембриж каби нуфузли университетлар билан ҳамкорлик алоқаларини йўлга қўйган.
Марказ фаолиятида эришилган натижалар иштирокчиларда катта таассурот қолдирди.
Хорижий фондлардан олиб келинган 130 мингта қўлёзманинг электрон нусхалари тўпланган, замонавий лабораторияларда 550 та нодир қўлёзма китоб қайта тикланган, Имом Бухорий ҳамда бошқа мутафаккирлар асарларидан 52 таси илк бор она тилимизга таржима қилинган. Шунингдек, 128 та китоб ва рисола нашр этилгани қайд этилди.
Саёҳат ҳақида устоз журналист Жаҳонгир Исмоилов ўз фикрларида шундай билдирди:
— Биз бугун илмий муассасани, қолаверса, миллий ўзлигимизнинг англатаётган масканни кўрдик. Қўлёзмаларга бўлган эҳтиром, реставрация ишларидаги аниқлик ва илмий ёндашув кишида фахр уйғотади.
Кейинги манзил Самарқанд шаҳридаги Гўри Амир мақбараси ва Регистон майдонида бўлди. Гўри Амир мажмуаси Соҳибқирон Амир Темур ва Темурийлар сулоласи дафн этилган муқаддас қадамжо ҳисобланади.
Шунингдек, Регистон майдонидаги мадрасалар меъморчилиги, кошинкорлик санъати ва тарихий муҳит иштирокчиларда катта таассурот қолдирди.
Журналистлар уюшмаси вилоят бўлими раиси Гулшода Иброҳимова: Биз бугун Самарқанд заминига шунчаки зиёратчи эмас, балки буюк аждодимизнинг ворислари сифатида келдик. Имом Бухорий — бизнинг ифтихоримиз, ғуруримиз.
Бугунги ижодий сафаримизнинг асл моҳияти ҳам ҳадис илми султони қолдирган илмий хазинани, маънавий меросни, нафақат ўрганиш, балки уни қалбдан ҳис қилишдир. Илмий-тадқиқот марказида олиб борилаётган ишлар, ноёб қўлёзмаларнинг қайта тикланиши — буларнинг барчаси Бухоро илмий мактабининг бардавомлигидан далолат беради. Биз Имом ал-Бухорийнинг муқаддас қадамжоларини зиёрат қилиш орқали маънавий қувват олдик. Журналист ва ижодкорларимиз мана шу фахрланиш ҳиссини, аждодларимизнинг дунё илм-фанидаги ўрнини халқимизга етказишларини истардик.
Медиа-тур якунида иштирокчилар Бухоро ва Самарқанд ўртасидаги маънавий ва маданий алоқаларни янада мустаҳкамлаш, тарихий меросни асраб-авайлаш ва уни кенг тарғиб қилиш йўналишидаги ишларга юқори баҳо бердилар.
Зулфизар Мавлонова