Когон: ҳунари ортидан Суннат Ахмедов маҳалладошлари бандлигига ҳам ҳисса қўшмоқда
2026-04-14 19:10:00 / Янгиликлар
Бир неча йил бурун у фаолиятини электр пайвандловчилигидан бошлаган. Ҳунарга бўлган қизиқиши ва интилиши туфайли ўтган йили ҳоким ёрдамчиси кўмагида ажратилган имтиёзли кредит маблағини олиб, бу сармояга замонавий русумдаги зарур техника жиҳозларини харид қилган ва ўзининг кичик цехини ташкил этган. Бугун бу цехда металлга ишлов берилиб, турли хил ва кўринишдаги, мустаҳкам дарвозалар, темир панжаралар, шунингдек, қурилишбоп қолиплар, метал конструкциялар тайёрланмоқда. Маҳсулот сифати ва рақобатбардошлиги мижозлар сафини кенгайтириб, буюртмалари сонини оширмоқда.
Суннат Ахмедов нафақат пайвандловчи ҳунарманд сифатида, балки кичик корхонасига эга тадбиркор сифатида масъулиятни ҳис этиб, маҳалладошларини иш билан таъминлашда ҳам фаоллик кўрсатмоқда. Ҳозирги кунда унинг цехида 3 нафар ишчи меҳнат қилаётган бўлса, “Ҳунар ҳунардан унар” деганларидек, ёшлардан яна ўнга яқин шогирд тайёрланмоқда. Уларга металлга ишлов бериш, пайвандлаш сирлари ўргатиб келинмоқда.
Ёш тадбиркорнинг таъкидлашича, айни кунда цехда тайёрланаётган металл конструкциялар ҳисобидан ойига 15-18 миллион сўмга етказиб даромадга эришилмоқда. Бу дегани, кичик корхонанинг йиллик эришаётган моддий манфаатдорлиги 150 миллион сўмдан кам эмас. Буюртма асосида тайёрланаётган маҳсулотлар ўз харидорини топган экан, ташаббускор томони фаолиятини кенгайтириш ҳаракатига тушган.
Вилоят ҳокимлиги матбуот хизмати