Бухоро вилояти ҳокимлиги

Ташриф давомида меҳмонлар биринчи навбатда Зарафшон маҳалласидаги  “Соҳилбўйи” лойиҳаси билан таништирилди. Ушбу лойиҳа доирасида юздан ошиқ тадбиркорлик субъекти ишга туширилган бўлиб, ўнлаб хонадон моддий манфаатдорлиги таъминланмоқда. Мазкур дам олиш мажмуи умумий қиймати 20 миллиард сўмга тенг бўлиб, бир кунда 500 мижозга хизмат кўрсатиш имконияти яратилади. Ҳадемай, қуриб битказилиб, тўлиқ ишга туширилиши мўлжалланган лойиҳанинг аҳамияти, маҳаллий бюджетга 720 миллион сўм даромад кирим қилиниши, муҳими, бунда 200 га яқин фуқаронинг иш билан таъминланиши кўзланган.

“Бухоро зовури” бўйида 1,5 минг метр масофада барпо қилинган “Соҳил бўйи кўнгилочар маскани” лойиҳаси меҳмонлар ва ҳатто, хорижий сайёҳларга савдо ва маиший хизмат кўрсатилиши баробарида, ҳудуд миқроиқлимини шакллантиришда ҳам ўз ўрнига эга бўлади. Албатта, соҳилбўйи тунги ёритиш чироқлари, тўлиғича ҳимоя тўсиғи, темир панжаралар билан ўраб олиниб, бунда пиёдалар йўлаклари ҳам барпо қилинган. Каналнинг обод қилинган икки қирғоғида жами 500 тупдан ортиқ манзарали дарахт кўчати ўтқазиб, парваришланмоқда.  

Меҳмонлар Ушот ҳунармандлар маҳалласида бўлдилар. Бу қишлоқ кўп йилдирки, тандирсозликда довруғ ёйган ҳудудлардан. Бунда тандир ясашда оилавий анъаналарини давом эттириб келаётган шажара ва сулолалар бор. Ҳозирда Ушотда 150 дан ортиқ оила ушбу қадим касб-кор билан шуғулланиб, шу ҳалол меҳнат орқасидан даромад топиб, орзу-ҳавасларини кўриб келмоқда. Улар томонидан ҳар йили 20 мингдан ортиқ тандир тайёрланиб, нафақат вилоят туманлари, маҳалла ва қишлоқларига, бошқа вилоятларга ҳам буюртма асосида тайёрлаб, етказиб берилмоқда.

Ушотда нафақат тандирсозлик, нафис каштачилик, сўзаначилик, зардўзлик санъати ҳам давом эттирилиб, ушотлик қандолатпазлар томонидан тайёрланаётган қандолат маҳсулотлари, миллий ширинлик ва ҳолваларнинг ҳам харидоргирлиги ортиб бормоқда. Шу нуқтаи назардан, айни кунда 4 мингга яқин аҳолисига эга қишлоқнинг “драйвери”дан келиб чиқиб, бунда “Ушот— ҳунармандлар маҳалласи” ташкил этилаётгани айни муддао.

Шунингдек, меҳмонлар туман марказидаги “24/7” кўча лойиҳаси билан таништирилди. Ушбу лойиҳа доирасида 65 та янги тадбиркорлик субъекти ташкил этилган ва 200 нафар ишчи-ходим иш билан таъминланган. Лойиҳанинг мақсади маҳаллий иқтисодиётга янгича динамика олиб кириш ва ёш тадбиркорларни қўллаб-қувватлашдан иборат.

 Бу ерда қорақалпоғистонлик ҳоким ёрдамчилари тадбиркор, ҳунармандлар билан учрашиб, улар ишлари, бизнес лойиҳалари билан танишдилар.  Маҳалла масъуллари, истиқболли лойиҳа ва ташаббуслар, ишлаб чиқариш, савдо-сотиқ тизими ҳақида батафсил маълумотга эга бўлдилар. 

 Вилоят ҳокимлиги матбуот хизмати