Қоровулбозор: “Навбаҳор” маҳалласидаги 5 гектарли иссиқхонада саримсоқпиёз етиштирилмоқда
2026-03-12 15:45:00 / Янгиликлар
Худди шундай, ҳудудда 14 гектар иссиқхона ер майдони 35 нафар ташаббускорга жами 21 миллиард сўм миқдорида имтиёзли кредит маблағи асосида ажратиб берилган. Бу иссиқхоналар мажмуасининг ишга туширилиши 380 та доимий ва 760 та мавсумий иш ўрни яратиш имконини бермоқда. Бу лойиҳада 400 нафар ёшни иш билан таъминлаш кўзда тутилган.
Аҳоли турмуш даражасини ошириш ва камбағалликни қисқартириш мақсадида “Туронбанк” каби молиявий институтлар ҳудудда фақат кредитлаш эмас, балки маҳаллабай ёндашув, ижтимоий ташаббуслар ва иш ўринлари яратишга йўналтирилган лойиҳалар билан фаол иштирок этмоқда. Шундай лойиҳалардан бири Навбаҳор маҳалласида ташкил қилинган 5 гектардан иборат иссиқхонада амалга оширилмоқда.
Айни кунда мазкур иссиқхона ерида саримсоқпиёз экиб етиштирилаётган бўлиб, бундан ҳадемай 30 тоннадон ортиқ ҳосил олиш кўзланган. Бундан ташқари, иссиқхонанинг 2 гектар майдонида исмалоқ етиштирилиб, бозор расталарига чиқарилмоқда. Яна экин ерининг 1 гектар қисмида картошка ҳамда 10 гектар очиқ ерда қовун-тарвуз етиштиришга пухта тайёргарлик кўрилмоқда.
Биргина иссиқхона туфайли бугун бу ерда 6 нафар доимий ва 40 нафарга яқин мавсумий иш ўринлари яратилиб, аҳоли даромадини ошириш чоралари кўрилмоқда. Албатта, бу саъй-ҳаракат ҳудудда озиқ-овқат хавфсизлигини таъминлаш, аҳоли бандлигини таъминлашда муҳим аҳамиятга эга.
Вилоят ҳокимлиги матбуот хизмати