Бухоро вилояти ҳокимлиги

Айниқса, спорт инфратузилмасини замонавий талаблар асосида янгилаш ва кенгайтиришга алоҳида эътибор қаратилмоқда.

Бугун Бухорода фойдаланишга топширилган замонавий спорт курашлари маркази ҳам ана шу эзгу саъй-ҳаракатларнинг амалий натижасидир.

Яккакураш спорт турларига ихтисослаштирилган спорт мактаби ҳудудида 3,5 млрд. сўмлик маблағлар эвазига барпо этилган мазкур иншоотда бир вақтнинг ўзида 100 нафардан ортиқ ёш спортчининг машғулот олиб бориши учун барча шарт-шароитлар яратилган. 

Замонавий спорт жиҳозлари, қулай кийиниш хоналари, санитария-гигиена талабларига жавоб берадиган инфратузилма, мураббийлар учун алоҳида хоналар — буларнинг барчаси ёшларимизнинг юқори савияда тайёргарлик кўришига, йил давомида спорт билан шуғулланиш, нуфузли мусобақалар ўтказиш, юксак малакали спортчиларни тайёрлаш ва энг асосийси ёшларимизни оммавий спорт турларига кенг жалб этишга хизмат қилади.

Марказнинг очилиши муносабати билан тантанали тадбир ташкил этилди. Унда вилоят ва шаҳар ҳокимликлари, ҳуқуқни муҳофаза қилувчи идоралар мутасаддилари, спорт соҳаси фахрийлари, жамоатчилик вакиллари, нуронийлар ва ёшлар иштирок этди. 

Тадбирда вилоят ҳокими Ботир Зарипов мамлакатда олиб борилаётган кенг миқёсли ислоҳотларда соғлом ва баркамол ёш авлодни тарбиялаш, жисмоний тарбия ва спортни ривожлантиришга алоҳида эътибор қаратилаётганлигини таъкидлади. Замонавий спорт курашлари маркази очилиши нафақат спортчиларимиз, балки бутун вилоятимиз аҳли учун катта байрам эканлиги эътироф этилди.

-Ишонаманки, ана шу янги спорт залида тарбия топаётган ёшларимиз келгусида республика ва халқаро мусобақаларда вилоятимиз шарафини муносиб ҳимоя қилади. Бу ердан юртимиз байроғини халқаро ареналарда баланд кўтариб чиқадиган чемпионлар етишиб чиқади,-деди вилоят раҳбари.

Тантанали тадбирда марказ қурилишида жонбозлик кўрсатган муҳандис-қурувчилар, шунингдек, ҳамкор ташкилотларга миннатдорлик билдирилиб, эҳтиром кўрсатилди. 

Шу билан бирга, спорт курашлари бўйича ўтказилган нуфузли мусобақларнинг ғолиб ва совриндорларига пул мукофотлари топширилди.

Вилоят ҳокимлиги матбуот хизмати